جنت مرزا نے برائیڈل کاؤچر ویک میں ریمپ واک پر تنقید کے بعد خاموشی توڑ دی
سوشل میڈیا اسٹار جنت مرزا نے برائیڈل کاؤچر ویک میں ریمپ واک کے دوران ہونے والی شدید تنقید کے بعد اپنی وضاحت دی ہے۔ جنت مرزا نے اپنی وضاحتی ویڈیو میں تسلیم کیا کہ ریمپ واک ان کے لیے توقع سے کہیں زیادہ مشکل ثابت ہوئی۔ ابتدا میں انہیں لگا تھا کہ وہ اس تجربے کو آسانی سے مینیج کر لیں گی، لیکن حقیقت میں یہ ان کے لیے ایک چیلنج بن گیا۔
جنت مرزا کے مطابق، شو کے دوران ان کا لباس غیر معمولی حد تک بھاری تھا، جسے سنبھالنا ان کے لیے مشکل ہو گیا۔ انہوں نے یہ بھی بتایا کہ اس دوران ایک ذاتی وجہ کی بنا پر وہ ذہنی دباؤ کا شکار تھیں، تاہم انہوں نے اس حوالے سے تفصیل بتانے سے گریز کیا۔
جنت مرزا کا کہنا تھا کہ شو کے دوران کئی چیزیں ریہرسل کے مطابق نہیں ہوئیں، جس کا براہِ راست اثر ان کی واک پر پڑا۔ انہوں نے اس بات کی بھی وضاحت دی کہ ریمپ پر لائٹنگ اور دیگر انتظامی معاملات ویسے نہیں تھے جیسے انہیں بتایا گیا تھا، جس کی وجہ سے وہ کنفیوز ہو گئیں۔
تاہم، ان تمام مشکلات کے باوجود جنت مرزا نے اس تجربے کو ایک نیا اور سیکھنے والا موقع قرار دیا۔ ان کا کہنا تھا کہ یہ ان کے لیے ایک سیکھنے کا تجربہ رہا اور انہوں نے اپنی کوشش کو بھرپور طریقے سے پیش کیا۔
جنت مرزا کی وضاحتی ویڈیو سوشل میڈیا پر وائرل ہو چکی ہے، جہاں مختلف ردعمل سامنے آ رہے ہیں۔ کچھ مداحوں نے ان کی حوصلہ افزائی کی، جبکہ دیگر اب بھی ریمپ واک کے معیار پر سوال اٹھا رہے ہیں۔
