بارش اور برفباری? این ڈی ایم اے نے الرٹ جاری کر دیا

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف حصوں میں شدید موسمی صورتحال کے پیش نظر الرٹ جاری کر دیا ہے۔ این ڈی ایم اے کے نیشنل ایمرجنسیز آپریشن سینٹر کے مطابق گلگت بلتستان، بالائی خیبر پختونخوا اور آزاد کشمیر میں شدید سردی کی لہر کا خدشہ ہے۔

الرٹ میں بتایا گیا ہے کہ آئندہ چند دنوں اور جنوری کے آخر تک رات اور صبح کے اوقات میں شدید سرد موسم متوقع ہے، جبکہ بالائی علاقوں میں درمیانے سے شدید درجے کی برفباری کا امکان ہے۔ ممکنہ برفباری کے باعث رابطہ سڑکیں، ٹرانسپورٹ اور بجلی کی فراہمی متاثر ہو سکتی ہے، جبکہ پہاڑی علاقوں میں برفانی تودے گرنے اور پھسلن کے خطرات میں بھی اضافہ ہو سکتا ہے۔

محکمہ موسمیات کے مطابق کمزور مغربی ہواؤں کا سلسلہ 16 جنوری سے ملک میں داخل ہوگا۔ ان مغربی ہواؤں کے زیر اثر سندھ کے مختلف اضلاع سمیت کراچی میں 22 اور 23 جنوری کو گرج چمک کے ساتھ بارش کا امکان ظاہر کیا گیا ہے۔

این ڈی ایم اے نے خبردار کیا ہے کہ شدید سردی اور برفباری بچوں، بزرگوں اور بیمار افراد کی صحت کو متاثر کر سکتی ہے، اس لیے خصوصی احتیاطی تدابیر اختیار کی جائیں۔ میدانی علاقوں میں سرد اور خشک موسم کے ساتھ بعض مقامات پر کورا یا پالا پڑنے کا امکان ہے جس سے فصلوں اور باغات کو نقصان پہنچنے کا خدشہ ہے۔

الرٹ میں عوام کو ہدایت کی گئی ہے کہ پہاڑی علاقوں میں غیر ضروری سفر سے گریز کریں اور برفباری والے علاقوں میں گاڑیوں کے ٹائروں پر حفاظتی زنجیروں کا استعمال یقینی بنائیں۔ شدید سرد موسم کے دوران گرم کپڑوں اور ہیٹر کا محفوظ استعمال کرنے، جبکہ بچوں، بزرگوں اور بیمار افراد کا خاص خیال رکھنے پر زور دیا گیا ہے۔

این ڈی ایم اے نے صوبائی اداروں اور ضلعی انتظامیہ کو ہدایت کی ہے کہ پہاڑی علاقوں میں ممکنہ برفباری کے پیش نظر پیشگی اقدامات کریں اور ضروری مشینری کی دستیابی یقینی بنائیں۔ اس کے علاوہ سیاحتی مقامات پر دستیاب وسائل، بالخصوص رہائشی سہولیات کو مدنظر رکھتے ہوئے سیاحوں کی آمد و رفت کے لیے مناسب انتظامات کرنے کی بھی ہدایت جاری کی گئی ہے۔