راحت فتح علی خان اور عاطف اسلم کی شادیوں میں پرفارمنس فیسز: کروڑوں کے معاوضوں کا انکشاف

پاکستان کے عالمی شہرت یافتہ گلوکار راحت فتح علی خان اور عاطف اسلم نہ صرف اپنے لازوال گانوں بلکہ شاندار لائیو پرفارمنسز کے باعث بھی دنیا بھر میں پہچانے جاتے ہیں۔ بھارتی فلموں کے لیے گائے گئے سپرہٹ گانوں نے ان کی مقبولیت کو مزید دوام بخشا، جبکہ نجی تقریبات اور پرتعیش شادیوں میں ان کی موجودگی ہمیشہ خبروں کی زینت بنتی رہی ہے۔

دونوں معروف فنکار پاکستان میں ملک ریاض اور بھارت میں مکیش امبانی جیسے بااثر افراد کی شادیوں میں بھی پرفارم کر چکے ہیں، جہاں ان کی فیس ہمیشہ موضوعِ بحث بنی رہی۔ حال ہی میں فریال تالپور کی صاحبزادی عائشہ تالپور کی شادی نے بھی سوشل میڈیا پر خاصی توجہ حاصل کی، جہاں راحت فتح علی خان اور عاطف اسلم نے اپنی آواز کا جادو جگایا۔ باخبر ذرائع کے مطابق دونوں گلوکاروں نے معزز مہمانوں کی خصوصی فرمائش پر اپنے مقبول گانے پیش کیے اور محفل کو یادگار بنا دیا۔

اس حوالے سے سینئر اینکر پرسن نعیم حنیف نے حالیہ گفتگو میں ان گلوکاروں کی پرفارمنس فیسز سے متعلق دلچسپ انکشافات کیے۔ ان کے مطابق راحت فتح علی خان پاکستان میں کسی شادی پر پرفارم کرنے کے لیے تقریباً ایک کروڑ پچیس لاکھ روپے وصول کرتے ہیں۔ اگر پرفارمنس کسی دوسرے شہر میں ہو تو فیس میں اضافہ ہو جاتا ہے، جبکہ بیرونِ ملک پرفارمنس کی صورت میں ان کا معاوضہ تقریباً دگنا ہو جاتا ہے۔

نعیم حنیف نے عاطف اسلم کے بارے میں بتایا کہ وہ ماضی میں شادیوں میں پرفارم نہیں کیا کرتے تھے۔ تاہم تقریباً سات سال قبل ملک ریاض نے انہیں اپنے پوتے کی شادی میں گانے کی پیشکش کی۔ عاطف اسلم نے بظاہر انکار کے لیے ڈیڑھ کروڑ روپے کا مطالبہ کیا، مگر ملک ریاض نے وہ رقم ادا کر دی۔ نعیم حنیف کے مطابق انہوں نے اس ادائیگی کا بل خود دیکھا تھا۔ اسی واقعے کے بعد عاطف اسلم نے شادیوں میں پرفارم کرنا شروع کیا اور اب وہ فی پرفارمنس تقریباً دو سے ڈھائی کروڑ روپے وصول کرتے ہیں۔