ڈھاکا: بنگلا دیش کے کرکٹرز نے بنگلا دیش کرکٹ بورڈ (بی سی بی) کے ایک اعلیٰ عہدیدار کے متنازع بیان کے بعد کھیل کے تمام فارمیٹس کے بائیکاٹ کی وارننگ جاری کر دی ہے۔
یہ تنازع اس وقت سامنے آیا جب بی سی بی کے ڈائریکٹر نظم الاسلام نے سابق قومی اوپنر تمیم اقبال کو سوشل میڈیا پر تنقید کا نشانہ بناتے ہوئے انہیں ’’انڈین ایجنٹ‘‘ قرار دیا۔ نظم الاسلام نے اپنی پوسٹ میں لکھا کہ اس بار بنگلا دیش کے عوام نے اپنی آنکھوں سے ایک اور انڈین ایجنٹ کو دیکھا ہے۔
نظم الاسلام کا یہ بیان اس وقت سامنے آیا جب تمیم اقبال نے حال ہی میں کہا تھا کہ بنگلا دیش کو ٹی 20 ورلڈ کپ 2026 کے لیے بھارت نہ جانے کے فیصلے پر احتیاط سے غور کرنا چاہیے۔ اس بیان کے بعد بی سی بی ڈائریکٹر کی جانب سے سخت ردعمل سامنے آیا۔
بنگلا دیش کے کرکٹرز نے واضح وارننگ دی ہے کہ اگر بی سی بی کے ڈائریکٹر ایم نظم الاسلام نے استعفیٰ نہ دیا تو وہ بین الاقوامی اور ڈومیسٹک کرکٹ سمیت کھیل کے تمام فارمیٹس کا بائیکاٹ کریں گے۔
کرکٹرز کی نمائندہ تنظیم کرکٹرز ویلفیئر ایسوسی ایشن آف بنگلا دیش کے صدر محمد میٹھن نے ایک ورچوئل پریس کانفرنس میں اعلان کیا کہ اگر بورڈ ڈائریکٹر مستعفی نہیں ہوتے تو تمام میچز کو معطل کر دیا جائے گا۔
دوسری جانب بنگلا دیش کرکٹ بورڈ نے ایک باضابطہ بیان جاری کرتے ہوئے متنازع بیان سے خود کو الگ کر لیا ہے۔ بی سی بی کے مطابق ایسے بیانات بورڈ کی پالیسی، اقدار یا سرکاری مؤقف کی نمائندگی نہیں کرتے، اور صرف مناسب اور باضابطہ ذرائع سے جاری کیے گئے بیانات کو ہی بورڈ کی آفیشل پوزیشن سمجھا جانا چاہیے۔
بی سی بی نے واضح کیا ہے کہ نظم الاسلام کے ذاتی ریمارکس سے بورڈ کا کوئی تعلق نہیں ہے۔
