مظاہرین کو پھانسی؟ ایرانی وزیر خارجہ نے حقیقت کھول دی
تہران: ایرانی وزیر خارجہ عباس عراقچی نے مظاہرین کو پھانسی دینے سے متعلق خبروں کو سختی سے مسترد کرتے ہوئے کہا ہے کہ ایران میں ایسی کسی کارروائی کا کوئی منصوبہ موجود نہیں۔
امریکی نشریاتی ادارے فاکس نیوز کو دیے گئے انٹرویو میں عباس عراقچی نے واضح کیا کہ مظاہرین کو پھانسی دینے کا سوال ہی پیدا نہیں ہوتا اور اس حوالے سے پھیلنے والی خبریں مکمل طور پر بے بنیاد اور گمراہ کن ہیں۔
ایرانی وزیر خارجہ کے مطابق ملک میں معاشی مشکلات کے خلاف ابتدائی طور پر دس دن تک پرامن احتجاج ہوا، تاہم اس کے بعد تین دن کے دوران تشدد کے واقعات دیکھنے میں آئے۔ انہوں نے دعویٰ کیا کہ یہ تشدد اسرائیل کی جانب سے منظم کیا گیا تھا۔
عباس عراقچی کا کہنا تھا کہ مظاہروں میں شامل بعض عناصر کو بیرونِ ملک سے کنٹرول کیا جا رہا تھا۔ ان کے مطابق کچھ مظاہرین نے پولیس اہلکاروں پر فائرنگ کی، داعش طرز کی کارروائیاں کی گئیں اور بعض مقامات پر پولیس اہلکاروں کو زندہ جلانے کے واقعات بھی پیش آئے۔
انہوں نے مزید کہا کہ اب صورتحال مکمل طور پر قابو میں ہے، ملک میں امن بحال ہو چکا ہے اور وہ پورے یقین کے ساتھ کہہ سکتے ہیں کہ مظاہرین کو پھانسی دینے کا کوئی منصوبہ زیر غور نہیں ہے۔
