بشریٰ انصاری کا کراچی کی بگڑتی صورتحال پر شدید ردعمل
کراچی: معروف سینئر اداکارہ بشریٰ انصاری نے شہر کی بگڑتی ہوئی صورتحال پر شدید برہمی کا اظہار کرتے ہوئے کراچی کے ذمہ داران سے سوال کیا ہے کہ اگر وہ خود کراچی کے باسی ہیں تو کیا انہیں اپنے شہر سے محبت نہیں؟
انسٹاگرام پر جاری ایک ویڈیو پیغام میں بشریٰ انصاری نے کہا کہ کراچی میں گندگی، ٹوٹی ہوئی سڑکیں، ناقص انفراسٹرکچر اور ناکارہ صفائی کا نظام انتہائی تشویشناک حد تک بگڑ چکا ہے۔
انہوں نے مزید کہا کہ کراچی پورے ملک کو روزگار فراہم کرتا ہے، لیکن دہائیوں سے اس کی بہتری کے لیے کوئی مؤثر قدم نہیں اٹھایا گیا۔ بشریٰ انصاری کا کہنا تھا کہ وہ کسی سیاسی جماعت کو نشانہ نہیں بنا رہیں، تاہم ذمہ داران کی خاموشی اور عدم دلچسپی شہر کے لیے سنگین مسئلہ بن چکی ہے۔
اداکارہ نے شہریوں سے اپیل کی کہ وہ اپنے حقوق کے لیے آواز بلند کریں اور شہر کی بہتری کے لیے عملی اقدامات کا مطالبہ کریں۔
یہ پیغام کراچی کے مسائل پر سنجیدہ توجہ دینے اور اس کے حل کے لیے عوامی و حکومتی سطح پر اقدامات کی ضرورت کا عندیہ دیتا ہے۔
