منزہ عارف کا انکشاف: "میں نے اپنے شوہر کو دوسری شادی کا مشورہ دیا تھا”

پاکستانی ڈرامہ انڈسٹری کی سینئر اداکارہ منزہ عارف نے حالیہ انٹرویو میں اپنی ذاتی زندگی کے بارے میں ایک دلچسپ انکشاف کیا۔ اداکارہ نے بتایا کہ انہوں نے اپنے شوہر کو ہنسی مذاق میں دوسری شادی کرنے کا مشورہ دیا تھا۔
منزہ عارف نے انٹرویو کے دوران اپنی شوبز میں آنے کے سفر اور نجی زندگی کے بارے میں کھل کر بات کی۔ انہوں نے بتایا کہ شوبز میں قدم رکھنے سے قبل وہ لاہور میں بطور ماہر تعلیم کام کر رہی تھیں اور اسی دوران انہوں نے ڈرامہ انڈسٹری میں قدم رکھا۔ اب وہ کراچی میں اپنے پروجیکٹس کی وجہ سے طویل عرصے سے مقیم ہیں۔
اداکارہ نے کہا کہ کراچی میں رہنے کی وجہ سے انہیں شوہر کی فکر رہتی تھی اور جب بھی وہ لاہور یا کراچی کے درمیان سفر کرتی تو ان کے شوہر انہیں خود ایئرپورٹ چھوڑنے اور لینے آتے تھے۔ منزہ عارف نے بتایا کہ ان کا شوہر ان کے لیے سب سے بڑا سہارا ہیں اور وہ ہمیشہ ان کی حمایت کرتے ہیں۔
ایک دلچسپ واقعہ بیان کرتے ہوئے منزہ نے کہا کہ کراچی میں طویل قیام کے دوران انہوں نے ہنسی مذاق میں اپنے شوہر سے کہا کہ "آپ چاہیں تو دوسری شادی کر سکتے ہیں کیونکہ شاید آپ تنہائی محسوس کرتے ہوں”۔ انہوں نے کہا کہ انہیں لگا تھا کہ شوہر یہ سن کر خوش ہو جائیں گے، لیکن شوہر نے الٹا پریشان ہو کر سوال کیا کہ "تم یہ مشورہ کیوں دے رہی ہو؟ کیا تمہارے ذہن میں کوئی اور پلان ہے؟”
منزہ عارف نے اس موقع پر ہنستے ہوئے کہا کہ یہ صرف ایک مذاق تھا اور ان کے شوہر نے اسے بالکل سنجیدہ نہیں لیا۔ اداکارہ نے مزید کہا کہ ان کے شوہر ہمیشہ ان کی حمایت کرتے ہیں اور وہ ان کے ہر قدم پر ان کے ساتھ کھڑے رہتے ہیں، جس کے لیے وہ ان کا شکریہ ادا کرتی ہیں۔
منزہ عارف کے اس انکشاف نے ان کے مداحوں کے درمیان خوشگوار حیرانی پیدا کر دی ہے، اور اس سے ان کی زندگی کے خوشگوار پہلو بھی سامنے آئے ہیں۔