عظمیٰ گیلانی اور سہیل احمد کی جذباتی ملاقات نے مداحوں کے دل جیت لیے

پاکستانی ٹیلی ویژن کی سینئر اور معروف اداکارہ عظمیٰ گیلانی اور اداکار سہیل احمد کی حالیہ ملاقات نے سوشل میڈیا پر خوب توجہ حاصل کی۔ عظمیٰ گیلانی جو کئی دہائیوں سے آسٹریلیا میں مقیم ہیں، اس وقت پاکستان کے دورے پر ہیں اور اس دوران انہوں نے اپنے پرانے ساتھی فنکاروں اور دوستوں سے ملنے کا سلسلہ جاری رکھا ہوا ہے۔
حال ہی میں ریڈیو پاکستان لاہور میں عظمیٰ گیلانی اور سہیل احمد کی ملاقات نے مداحوں کو جذباتی کر دیا۔ دونوں فنکار ایک دوسرے کو دیکھ کر آبدیدہ ہوگئے اور گلے ملتے ہوئے پرانی یادیں تازہ کیں۔
عظمیٰ گیلانی کی یادیں
عظمیٰ گیلانی نے اس ملاقات کے دوران ایک پرانی یاد کو شیئر کرتے ہوئے بتایا کہ ایک تقریب میں جب وہ مہمانوں کے درمیان بیٹھی ہوئی تھیں، تو سہیل احمد ان کے پاس آئے اور ان کا ہاتھ تھام کر کہا، "آپ یہاں نہیں بیٹھیں گی، میرے ساتھ اوپر چلیں۔” یہ خوبصورت لمحہ دونوں کے درمیان گہری دوستی اور محبت کا غماز تھا۔
سوشل میڈیا پر مداحوں کا ردعمل
عظمیٰ گیلانی اور سہیل احمد کی اس جذباتی ملاقات نے سوشل میڈیا پر مداحوں کے دل جیت لیے۔ ایک صارف نے کہا، "عظمیٰ گیلانی وقار اور خوبصورتی کی علامت ہیں” جبکہ ایک اور صارف نے لکھا، "انہیں ہر سال پاکستان آنا چاہیے، اپنے وطن میں انہیں ملنے والا احترام قابلِ دید ہے۔” ایک اور تبصرے میں کہا گیا کہ "عظمیٰ گیلانی پاکستانی انٹرٹینمنٹ انڈسٹری کی اصل اسٹار اور شاندار اداکارہ ہیں۔”
یہ ملاقات نہ صرف دونوں فنکاروں کی محبت اور تعلقات کا عکاس تھی بلکہ پاکستانی شوبز انڈسٹری میں احترام اور دوستی کی ایک خوبصورت مثال بھی پیش کرتی ہے۔