صنم ماروی نے اپنی زندگی کے نشیب و فراز اور مالی کامیابیوں کا انکشاف کیا

معروف لوک اور صوفی گلوکارہ صنم ماروی نے حال ہی میں سنو نیوز کے پوڈکاسٹ میں اپنی زندگی کے تجربات، مالی کامیابیوں اور کیریئر کی شروعات پر بات کی۔
انٹرویو میں صنم ماروی نے بتایا کہ ان کے کیریئر کی پہلی کمائی 27 ہزار روپے تھی، جس سے انہوں نے اپنی والدہ کے لیے گھر کا سامان جیسے فریج، ٹی وی اور بیڈ خریدا۔ یہ ان کے لیے ایک بڑی کامیابی تھی۔
صنم ماروی نے اپنے بچپن کے حالات بھی بیان کیے اور کہا کہ والد کے انتقال کے بعد ان کی والدہ نے بہت مشکلات کا سامنا کیا، اور انہیں بچپن میں بھوک کا بھی سامنا کرنا پڑا۔ تاہم، انہوں نے کبھی ہمت نہیں ہاری اور محنت سے شہرت اور مالی خوشحالی حاصل کی۔
انہوں نے مزید بتایا کہ 2017 میں ایک انٹرویو میں بھی انہوں نے بتایا تھا کہ گھر میں پانچ بہن بھائی تھے اور روزانہ صرف پانچ روٹیاں بنتیں، جنہیں سب نے بانٹ کر کھانا پڑتا۔ اکثر وہ اور ان کے والدین بھوکے ہی سوتے۔ والدہ اکثر کہتیں، "تم بڑے ہو، بھوک برداشت کر سکتے ہو، چھوٹوں کو کھانا کھانے دو۔”
صنم ماروی کی یہ داستان نہ صرف ان کی محنت اور عزم کی عکاس ہے بلکہ ان کے مداحوں کے لیے ایک حوصلہ افزا پیغام بھی ہے۔