ایشوریا رائے اور ابھیشیک بچن کا گوگل اور یوٹیوب کے خلاف مقدمہ، 4 کروڑ روپے ہرجانے کا دعویٰ

نئی دہلی: بالی ووڈ کی معروف جوڑی ایشوریا رائے بچن اور ابھیشیک بچن نے مصنوعی ذہانت (AI) سے تیار کردہ جعلی اور ڈیپ فیک ویڈیوز کے خلاف بڑا قدم اٹھاتے ہوئے گوگل اور یوٹیوب کے خلاف نئی دہلی ہائی کورٹ میں مقدمہ دائر کر دیا ہے۔

4 کروڑ روپے ہرجانے کا مطالبہ

غیر ملکی میڈیا رپورٹس کے مطابق، اداکار جوڑے نے عدالت سے تقریباً 4 کروڑ روپے ہرجانے کا مطالبہ کرتے ہوئے مؤقف اختیار کیا ہے کہ ڈیپ فیک ویڈیوز ان کی ساکھ کو شدید نقصان پہنچا رہی ہیں، اور ان میں ان کے چہروں اور آوازوں کا غلط استعمال کیا گیا ہے، جو ان کے شخصی اور تخلیقی حقوق کی سنگین خلاف ورزی ہے۔

ویڈیوز پر مستقل پابندی کی درخواست

اداکاروں نے عدالت میں جمع کرائی گئی درخواست میں یوٹیوب پر موجود ان جعلی ویڈیوز کے سیکڑوں لنکس اور اسکرین شاٹس بطور ثبوت پیش کیے ہیں اور استدعا کی ہے کہ ایسے مواد پر مستقل پابندی عائد کی جائے۔

گوگل سے تحریری جواب طلب

نئی دہلی ہائی کورٹ نے ابتدائی سماعت کے دوران گوگل کے وکیل سے تحریری جواب طلب کرتے ہوئے کیس کی اگلی سماعت 15 جنوری تک ملتوی کر دی ہے۔

پسِ منظر:

دنیا بھر میں ڈیپ فیک ٹیکنالوجی کے بڑھتے استعمال نے مشاہیر، فنکاروں اور عوامی شخصیات کی رازداری اور ساکھ کو خطرے میں ڈال دیا ہے۔ بھارت میں یہ معاملہ اب باقاعدہ قانونی محاذ پر آ چکا ہے، جہاں متاثرہ فنکار عدالتی تحفظ کے لیے رجوع کر رہے ہیں۔