مدیحہ امام کا انکشاف: "زندگی بھر کام کرنا پڑا تو فیصل قریشی کو چنوں گی”
کراچی (شوبز ڈیسک) – پاکستان کی معروف اداکارہ مدیحہ امام نے نجی ٹی وی کے مزاحیہ پروگرام "ہنسنا منع ہے” میں گفتگو کے دوران دلچسپ انکشافات کیے، جنہوں نے ناظرین کو خوب محظوظ کیا۔
پروگرام کے میزبان تابش ہاشمی کے سوال پر مدیحہ امام نے بتایا کہ اگر انہیں زندگی بھر صرف ایک اداکار کے ساتھ کام کرنے کا موقع ملے تو وہ فیصل قریشی کے ساتھ کام کرنا پسند کریں گی، کیونکہ وہ نہ صرف باصلاحیت بلکہ پیشہ ورانہ اخلاق کے بھی حامل ہیں۔
ترکیہ میں جعلی کرنسی کا واقعہ
مدیحہ نے دورانِ شو ایک یادگار اور پریشان کن واقعہ بھی شیئر کیا۔ انہوں نے بتایا کہ جب وہ پہلی بار ترکیہ گئیں تو کھانے کے حوالے سے احتیاط کے باعث زیادہ وقت ہوٹل میں گزارا، لیکن والدہ کے اصرار پر واپسی سے ایک دن قبل باہر نکلیں اور ایک ٹھیلے سے فروٹ چاٹ خریدی۔
اداکارہ نے بتایا کہ جب انہوں نے ترکش کرنسی میں ادائیگی کی، تو دکاندار غصے میں آ گیا اور سیکیورٹی گارڈ کو بلا لیا۔ مدیحہ زبان نہ جاننے کے باعث صورتحال کو سمجھ نہ سکیں، بعدازاں معلوم ہوا کہ ان کے پاس موجود نوٹ جعلی تھے، جو انہوں نے پاکستان سے تبدیل کروائے تھے۔ خوش قسمتی سے ان کے ساتھ موجود ویگن ڈرائیور نے رقم ادا کر کے معاملہ سنبھال لیا۔
جب مدیحہ کو یمنیٰ زیدی سمجھا گیا!
مدیحہ امام نے ایک دلچسپ شرمندگی بھرے لمحے کا ذکر کرتے ہوئے بتایا کہ بیرونِ ملک ایک مال میں ایک خاتون ان کے پاس آئیں اور ان کے ڈراموں کی تعریف کرنے لگیں۔ تاہم وہ خاتون دراصل یمنیٰ زیدی کے ڈراموں کے نام لے رہی تھیں۔
"مجھے لگا شاید میری یادداشت چلی گئی ہے کیونکہ وہ ڈرامے میرے تھے ہی نہیں،” مدیحہ نے مسکراتے ہوئے کہا۔
جب خاتون نے ان سے آٹوگراف مانگا، تو مدیحہ تھوڑا پریشان ہوئیں۔ اسی دوران خاتون کے شوہر نے آ کر تصحیح کی کہ یہ مدیحہ امام ہیں، یمنیٰ زیدی نہیں۔ جس پر خاتون شوہر سے بحث کرنے لگیں۔ مدیحہ نے آخرکار خاتون کو آٹوگراف دیا، مگر صرف "Love” لکھا — اپنا نام شامل نہیں کیا۔
مدیحہ امام کا مزاحیہ انداز اور عاجزی نے ناظرین کے دل جیت لیے
اس انٹرویو میں مدیحہ امام کا انکساری سے لبریز انداز اور خود پر ہنسنے کا سلیقہ دیکھ کر شائقین نے ان کی شخصیت کو مزید سراہا۔ سوشل میڈیا پر ان کی گفتگو کے کلپس وائرل ہو رہے ہیں۔
