غزالہ جاوید کا سخت ردعمل: "ماں کی حیثیت سے خود کو پہلے دیکھیں، کراچی والوں کو الزام نہ دیں”

کراچی: پاکستان شوبز انڈسٹری کی سینئر اداکارہ غزالہ جاوید نے مرحومہ اداکارہ حمیرا اصغر کی والدہ کے حالیہ بیان پر سخت ردعمل کا اظہار کیا ہے۔ انہوں نے کہا ہے کہ کسی بھی سانحے کا الزام دوسروں پر ڈالنے سے پہلے اپنی ماں ہونے کی ذمہ داریوں کا جائزہ لینا چاہیے۔

اداکارہ حمیرا اصغر کی لاش چند روز قبل کراچی کے ایک فلیٹ سے برآمد ہوئی تھی، جو تقریباً 10 ماہ پرانی بتائی جا رہی ہے۔ حمیرا کی والدہ نے ایک انٹرویو میں کراچی والوں کو بے حس قرار دیتے ہوئے کہا تھا کہ کسی نے ان کی بیٹی کی خبر نہیں لی، حالانکہ وہ کئی ماہ سے مردہ حالت میں موجود تھی۔

اس بیان پر ردعمل دیتے ہوئے، غزالہ جاوید نے نجی ٹی وی سے گفتگو میں کہا:
"حمیرا کی والدہ نے کہا کہ کراچی کے لوگ اچھے نہیں۔ تو میں ان سے پوچھتی ہوں: آپ کس قسم کی ماں ہیں؟ دو عیدیں گزر گئیں اور آپ کو اپنی بیٹی کی خیریت جاننے کا خیال تک نہ آیا؟”

غزالہ نے جذباتی انداز میں کہا:
"ایک ماں اپنے بچے کی معمولی سی تکلیف بھی محسوس کر لیتی ہے۔ میری بھی بیٹیاں ہیں، اگر ان میں سے کسی کو بخار ہو تو مجھے رات بھر نیند نہیں آتی۔ اگر میں ان کی جگہ ہوتی، تو اپنے شوہر یا بیٹے کی پروا کیے بغیر بیٹی کی خیر خبر ضرور لیتی۔”

اداکارہ نے مزید کہا کہ حمیرا اصغر ایک باوقار اور باصلاحیت لڑکی تھیں، جو کئی سال سے تنہا رہ رہی تھیں مگر کبھی کسی غلط کام میں ملوث نہیں ہوئیں۔
"اگر وہ غلط راستہ اپناتی تو شاید آج اس کے پاس اپنا گھر اور گاڑی ہوتی، لیکن وہ اصولوں پر سمجھوتہ نہیں کرتی تھی۔”

غزالہ جاوید نے حمیرا کے والدین کے لیے بھی افسوس کا اظہار کیا اور کہا کہ دنیا میں سب سے بدقسمت بچے وہ ہوتے ہیں جن کی ماں ان کے ساتھ نہیں ہوتی۔