اداکارہ دیشا پٹانی کے گھر کے باہر اندھا دھند فائرنگ، ویڈیو منظر عام پر آگئی

بریلی (بھارت): بالی وڈ کی معروف اداکارہ دیشا پٹانی کے گھر کے باہر ہونے والی اندھا دھند فائرنگ کی سی سی ٹی وی فوٹیج منظر عام پر آگئی ہے، جس نے عوام اور مداحوں میں تشویش کی لہر دوڑا دی ہے۔

بھارتی میڈیا رپورٹس کے مطابق یہ خطرناک واقعہ گزشتہ جمعہ کی شب 3:30 بجے پیش آیا جب دو نامعلوم موٹر سائیکل سوار حملہ آوروں نے بریلی میں واقع دیشا پٹانی کے آبائی گھر کے باہر اچانک فائرنگ شروع کردی۔

سی سی ٹی وی ویڈیو میں واضح طور پر دیکھا جاسکتا ہے کہ موٹر سائیکل پر سوار دو افراد اداکارہ کے گھر کے باہر پہنچتے ہیں، جن میں سے ایک حملہ آور اتر کر متعدد گولیاں فائر کرتا ہے اور پھر دونوں ملزمان موقع سے فرار ہوجاتے ہیں۔

واقعے کے بعد مقامی پولیس نے فوری کارروائی کرتے ہوئے جائے وقوعہ کا معائنہ کیا اور شواہد اکٹھے کیے۔ ابتدائی تحقیقات کے مطابق حملہ آوروں کی شناخت اور حملے کی وجوہات جاننے کی کوششیں جاری ہیں۔

دوسری جانب سیکیورٹی خدشات کے پیش نظر دیشا پٹانی کے گھر کے باہر پولیس کی اضافی نفری تعینات کردی گئی ہے۔ اداکارہ یا ان کے اہلِ خانہ کی جانب سے تاحال کوئی بیان سامنے نہیں آیا۔

یاد رہے کہ اس واقعے کے حوالے سے ایک نامعلوم گروپ نے سوشل میڈیا پر ذمہ داری قبول کرنے کا دعویٰ بھی کیا ہے، تاہم اس دعوے کی ابھی تک تصدیق نہیں ہوسکی۔

پولیس حکام کا کہنا ہے کہ ملزمان کی گرفتاری کے لیے خصوصی ٹیم تشکیل دے دی گئی ہے اور سی سی ٹی وی فوٹیج کی مدد سے تحقیقات کو تیز کیا جا رہا ہے۔