ٹام کروز کا نیا فنی سفر: میوزیکل فلموں میں کام کرنے کی خواہش کا اظہار

لندن: ہالی ووڈ کے عالمی شہرت یافتہ اداکار ٹام کروز نے فلمی دنیا میں ایک نئے اور دلچسپ شعبے کا رخ کرنے کا عندیہ دے دیا ہے۔ مشن امپاسیبل سیریز کی نئی فلم مشن امپاسیبل: دی فائنل ریکوننگ کی ریلیز سے قبل لندن میں ایک گفتگو کے دوران انہوں نے انکشاف کیا کہ وہ اب میوزیکل فلموں میں کام کرنے کے خواہش مند ہیں۔

ایکشن، ایڈونچر اور ڈرامہ کے بعد اب ٹام کروز اپنی فنی صلاحیتوں کو موسیقی کی دنیا میں آزمانا چاہتے ہیں۔ ان کا کہنا تھا:
"میں ہر فلم کے سیٹ پر کچھ نہ کچھ سیکھنے کی کوشش کرتا ہوں، اور اب میوزیکل فلمیں میری دلچسپی کا نیا میدان ہیں۔”
انہوں نے یہ بھی کہا کہ فنکار کے لیے سیکھنے کا عمل کبھی رکنا نہیں چاہیے، چاہے وہ گانا ہو یا کسی موسیقی کے آلے کو بجانا۔

ٹام کروز نے ہدایتکار و اداکار بین اسٹلر کے ساتھ دوبارہ کام کرنے کی خواہش کا بھی اظہار کیا، اور بتایا کہ وہ اپنے ہر کردار پر خود تحقیق کرتے ہیں تاکہ اسکرپٹ میں جان ڈال سکیں۔

یہ اعلان ان کے مداحوں کے لیے ایک خوش آئند خبر ہے، کیونکہ دنیا بھر میں ٹام کروز کو نہ صرف ایکشن ہیرو کے طور پر بلکہ ہمہ جہت اداکار کے طور پر بھی سراہا جاتا ہے۔ اب ان کی میوزیکل فلموں میں آمد یقینی طور پر ان کے کیریئر میں ایک نیا رنگ بھرے گی۔

یاد رہے کہ ٹام کروز کی نئی فلم مشن امپاسیبل: دی فائنل ریکوننگ 21 مئی کو سینما گھروں کی زینت بنے گی، اور مداح اس کے بعد شاید انہیں ایک نئے روپ میں گاتے اور پرفارم کرتے بھی دیکھ سکیں گے۔