پاکستانی سینما 2025: فلموں کی تعداد میں کمی، مگر ‘نیلوفر’ اور ‘لو گرو’ نے باکس آفس کو سہارا دیا
پاکستانی سینما 2025: فلموں کی تعداد میں کمی، مگر ‘نیلوفر’ اور ‘لو گرو’ نے باکس آفس کو سہارا دیا
لاہور/کراچی: پاکستانی فلم انڈسٹری کے لیے سال 2025 ملا جلا ثابت ہوا۔ ایک طرف جہاں ریلیز ہونے والی فلموں کی تعداد ماضی کے مقابلے میں سکڑتی نظر آئی، وہیں چند بڑی فلموں نے باکس آفس پر ریکارڈ بزنس کر کے فلم سازوں کی امیدیں برقرار رکھیں۔ عید الفطر پر 6 فلمیں میدان میں آئیں، مگر کامیابی چند ہی کے حصے میں آئی۔
باکس آفس کے فاتح: سپر ہٹ فلمیں
لو گرو (Love Guru): نامور ہدایت کار ندیم بیگ کی اس فلم نے سال کی سب سے بڑی کامیابی سمیٹی۔ فلم نے 12 کروڑ روپے کی شاندار اوپننگ لی اور دنیا بھر سے مجموعی طور پر 80 کروڑ روپے سے زائد کا بزنس کر کے اپنی دھاک بٹھا دی۔
نیلوفر (Neelofar): سال کے اختتام پر ریلیز ہونے والی اس فلم نے سینما گھروں کی رونقیں بحال کر دیں۔ فواد خان اور ماہرہ خان کی سپر ہٹ جوڑی ایک بار پھر بڑے پردے پر جادو جگانے میں کامیاب رہی۔ جذباتی کہانی پر مبنی یہ فلم اب بھی سینما گھروں میں کامیابی سے چل رہی ہے۔
دیمک (Deemak): ساس بہو کے تلخ رشتوں اور پراسرار واقعات پر مبنی اس فلم کو بھی عوامی پذیرائی ملی۔ فیصل قریشی، جاوید شیخ اور بشریٰ انصاری جیسی بڑی کاسٹ نے فلم کو چار چاند لگا دیے۔
بین الاقوامی سطح پر پزیرائی
ویلکم ٹو پنجاب: اگرچہ یہ فلم مقامی باکس آفس پر وہ جادو نہ دکھا سکی، لیکن اس نے آذربائیجان کے باکو فلمی میلے میں ‘بیسٹ آڈیئنس ایوارڈ’ جیت کر ملک کا نام روشن کیا۔ اس فلم میں زارا حیات اور عادی خان نے مرکزی کردار ادا کیے۔
ناکامیاں اور مشکلات
رواں سال کئی ایسی فلمیں بھی رہیں جو بڑے ناموں کے باوجود شائقین کو متاثر نہ کر سکیں:
قلفی: شہروز سبزواری اور جاوید شیخ جیسے اداکاروں کے باوجود یہ مزاحیہ فلم فلاپ ہوگئی۔
دی مارشل آرٹسٹ: شاز خان کی اس فلم کو سینما گھروں میں شوز ہی میسر نہ آسکے۔
کبیر اور ججی: یہ فلمیں بھی باکس آفس پر بری طرح ناکام ثابت ہوئیں۔
عشق لاہور اور لمبی جدائی: عید پر ریلیز ہونے والی ان پنجابی ایکشن اور رومانوی فلموں کو بھی خاطر خواہ رسپانس نہ ملا۔
تجزیہ: فلموں کی تعداد کیوں کم ہو رہی ہے؟
رپورٹ کے مطابق چند سال پہلے تک درجنوں فلمیں ریلیز ہوتی تھیں، مگر اب معیار اور بجٹ کے مسائل کی وجہ سے یہ تعداد کم ہو رہی ہے۔ شائقین اب صرف ان فلموں کا رخ کر رہے ہیں جن میں مضبوط کہانی اور بڑی کاسٹ موجود ہو۔
