بھارت: اداکارہ سمانتھا پربھو تقریب کے دوران مداحوں کے ہجوم کا نشانہ بن گئیں
حیدرآباد: بھارت کی معروف اداکارہ سمانتھا رتھ پربھو کو ایک تقریب کے دوران مداحوں کے ہجوم کی وجہ سے ہراسانی کا سامنا کرنا پڑا۔
ذرائع کے مطابق اداکارہ حیدرآباد میں ایک آؤٹ لیٹ کی افتتاحی تقریب میں شریک تھیں۔ تقریب سے واپسی کے دوران مداحوں نے انہیں گھیر لیا، جس کے باعث انہیں اپنی گاڑی تک پہنچنے میں شدید دشواری کا سامنا کرنا پڑا۔ تاہم ان کے سیکیورٹی گارڈز نے بہادری کا مظاہرہ کرتے ہوئے انہیں محفوظ طریقے سے گاڑی تک پہنچانے میں کامیابی حاصل کی۔
یہ واقعہ چند روز قبل بھارتی اداکارہ ندھی اگروال کے ساتھ پیش آنے والے ہجوم کے واقعے کی یاد تازہ کر گیا، جہاں بھی مداحوں نے تقریب سے واپسی پر انہیں گھیر لیا تھا۔
سوشل میڈیا صارفین نے مداحوں کی اس حرکت پر شدید تنقید کی اور سوال اٹھایا کہ اداکار بھی انسان ہیں، لیکن ہجوم اپنی حدود کا تعین کیوں نہیں کرتا۔
ماہرین کے مطابق ایسے واقعات فنکاروں کی ذاتی حفاظت اور عوامی مقامات پر سیکیورٹی انتظامات کی اہمیت کو اجاگر کرتے ہیں اور مداحوں کے رویے میں شعور پیدا کرنے کی ضرورت ہے۔
