معروف اداکار روب رائنر اور اہلیہ کا قتل، پولیس نے بیٹے کو گرفتار کر لیا
لاس اینجلس: ہالی ووڈ کے معروف اداکار اور ہدایتکار روب رائنر کے بیٹے، نک رائنر کو والدین روب اور مشیل رائنر کے قتل کے الزام میں گرفتار کر لیا گیا ہے۔
امریکی حکام کے مطابق روب اور مشیل رائنر کی لاشیں ان کے لاس اینجلس کے گھر سے ملی، جس کے بعد تحقیقات کے نتیجے میں ان کے بیٹے کو حراست میں لیا گیا۔
نک رائنر ماضی میں منشیات کی لت کے باعث طویل عرصے تک مشکلات کا شکار رہے۔ روب رائنر نے 2016 میں ایک پوڈکاسٹ میں انکشاف کیا تھا کہ ان کے بیٹے نے 15 سال کی عمر میں منشیات کا استعمال شروع کیا اور 19 سال کی عمر تک وہ کئی بار بحالی مراکز میں داخل رہے۔
روب اور نک رائنر نے مل کر 2015 میں فلم Being Charlie بنائی تھی، جو نک کی ہیروئن کی لت اور خاندانی اثرات پر مبنی تھی۔ روب رائنر کے مطابق فلم کا اختتام امید پر رکھا گیا تاکہ بحالی کے سفر کی حقیقت اجاگر کی جا سکے۔
نک رائنر نے مختلف انٹرویوز میں بتایا تھا کہ نشے کے دوران وہ بے گھر بھی رہے اور کم از کم 17 بار بحالی مراکز میں داخل ہوئے، اور کئی بار موت کے قریب پہنچ گئے۔
روب اور مشیل رائنر کی شادی 1989 میں ہوئی تھی اور ان کے تین بچے ہیں۔ خاندان چند ماہ قبل روب رائنر کی فلم Spinal Tap II کے پریمیئر پر اکٹھا نظر آیا تھا۔ قریبی عزیز اور دوست اس واقعے پر گہرے صدمے اور حیرت کا اظہار کر رہے ہیں۔
صحافی ماریا شریور نے کہا کہ روب اور مشیل رائنر اپنے بچوں سے بے حد محبت کرتے تھے، جبکہ اداکار ہیری شیئرر نے واقعے کو “یونانی المیے جیسا سانحہ” قرار دیا۔
