ماہرہ خان نے صبا قمر کے ساتھ مبینہ دشمنی پر پہلی بار کھل کر بات کی

اسلام آباد — مایہ ناز اداکارہ ماہرہ خان نے پہلی بار اداکارہ صبا قمر کے ساتھ مبینہ دشمنی اور جلن کے تاثر پر کھل کر اظہار خیال کیا۔
پاکستان کی یہ دو عالمی شہرت یافتہ اداکارائیں ہمیشہ سے فن اور شہرت کی بلندیوں پر ایک ساتھ سفر کرتی آئی ہیں۔ دونوں نے نہ صرف پاکستان میں بہترین کام کیا بلکہ بین الاقوامی سطح پر بھی اپنی صلاحیتوں کا لوہا منوایا، اور ان کی کامیابیوں نے پاکستانی فنکاروں کے لیے عالمی سطح پر احترام اور پذیرائی بڑھانے میں اہم کردار ادا کیا۔
سالوں سے یہ تاثر پایا جاتا رہا ہے کہ ماہرہ خان اور صبا قمر کے درمیان سرد جنگ ہے۔ اگرچہ دونوں نے ایک دوسرے کے خلاف کبھی کوئی منفی بیان نہیں دیا، لیکن میڈیا اور سوشل میڈیا پر بحث اکثر انہیں آمنے سامنے لے آتی رہی ہے۔ شائقین بھی اکثر اس بحث میں شامل ہوتے ہیں کہ ان میں سے کون بہتر ہے۔
حال ہی میں نجی ٹی وی پروگرام میں گفتگو کرتے ہوئے ماہرہ خان نے پہلی بار کھل کر اس مبینہ دشمنی پر بات کی۔ انہوں نے کہا کہ وہ ذاتی طور پر صبا قمر کے کام کی بہت عزت کرتی ہیں اور دونوں کے درمیان کوئی دشمنی نہیں۔
ماہرہ خان نے مزید کہا کہ دنیا ہمیشہ دو مضبوط اور کامیاب خواتین کو مقابلے میں دیکھنا چاہتی ہے، اسی لیے انہیں ایک دوسرے کے سامنے لا کھڑا کیا جاتا ہے اور یہ کہانی بنائی جاتی ہے کہ دونوں میں ناراضگی یا رقابت ہے۔
یہ بیان دونوں اداکاراؤں کے شائقین کے لیے خوش آئند ہے اور اس بات کی تصدیق کرتا ہے کہ میڈیا کے تخلیق کردہ تنازعے حقیقت پر مبنی نہیں ہوتے۔