سید نور کا ریشم اور سعود قاسمی کی تنقید پر معقول اور پُر اعتماد جواب
ویب ڈیسک: پاکستان کی فلم انڈسٹری کے نامور ہدایت کار اور مصنف سید نور نے اداکارہ ریشم اور اداکار سعود قاسمی کی جانب سے ان پر کی گئی تنقید پر اپنا مؤقف نہایت پُر اعتماد اور پرسکون انداز میں پیش کیا ہے۔
ایک پوڈکاسٹ میں گفتگو کرتے ہوئے سید نور نے کہا کہ اگر ریشم کو میرے ساتھ کام نہ کرنے سے نقصان ہوا ہے تو وہ خود اداکاری کے میدان میں کہاں تک پہنچیں؟ انہوں نے وضاحت کی کہ ریشم کی پہلی پانچ فلمیں، جن میں ‘دوپٹہ جل رہا ہے’، ‘گھونگھٹ’ اور ‘جیوا’ شامل ہیں، سپر ہٹ ثابت ہوئیں، مگر ہر کردار کے لیے وہ مناسب نہیں تھیں، اس لیے انہوں نے دیگر اداکاروں کے ساتھ کام شروع کیا۔
سید نور نے کہا،
"جب میں نے انہیں کاسٹ کرنا بند کیا تو ان کی کوئی بڑی فلم سامنے نہیں آئی۔ میں نے ان کا کیریئر بنانے کے لیے بہت محنت کی، لیکن کبھی نہیں بتاؤں گا کہ میں نے انہیں کیسے گروم کیا۔”
اداکار سعود قاسمی کی تنقید کے جواب میں سید نور نے نرمی کا مظاہرہ کرتے ہوئے کہا کہ انہیں نہیں لگتا کہ سعود کا مقصد برا کہنا تھا۔ ان کے خیال میں شاید سعود کا مطلب تھا کہ جب سید نور اور شان شاہد فلموں سے دور ہوئے تو انڈسٹری کمزور ہوگئی۔ انہوں نے مزید کہا کہ سعود اور ریشم دونوں ان کے بچوں کی طرح ہیں اور وہ ان کی تنقید پر ناراض نہیں ہوتے۔
سید نور کا یہ جواب ان کی پیشہ ورانہ پختگی اور وسیع الظرفی کا مظہر ہے، جس میں انہوں نے نہ صرف اپنا مؤقف واضح کیا بلکہ نوجوان فنکاروں کے لیے عزت و احترام کا رویہ بھی برقرار رکھا۔
