اطالوی لیجنڈ اداکارہ کلاڈیا کارڈینیل 87 برس کی عمر میں انتقال کر گئیں

پیرس – 24 ستمبر 2025:
اطالوی سینما کی مایہ ناز اور عالمی شہرت یافتہ اداکارہ کلاڈیا کارڈینیل 87 سال کی عمر میں فرانس میں انتقال کر گئیں۔ ان کے اہلِ خانہ کے مطابق، انتقال کے وقت ان کے بچے بھی ان کے ہمراہ تھے۔

کلاڈیا کارڈینیل کا فلمی کیریئر 60 سال سے زائد پر محیط رہا، جس کے دوران انہوں نے یورپی سینما کے ساتھ ساتھ ہالی ووڈ میں بھی نمایاں کردار ادا کیے۔ انہیں 2002 میں برلن فلم فیسٹیول میں لائف ٹائم اچیومنٹ ایوارڈ سے نوازا گیا تھا۔

ابتدائی زندگی:

کلاڈیا 15 اپریل 1938 کو تیونس میں پیدا ہوئیں، جہاں انہوں نے محض 16 سال کی عمر میں ایک مقابلۂ حسن جیتا۔ یہ کامیابی ان کے لیے وینس فلم فیسٹیول تک رسائی کا باعث بنی، جہاں سے ان کے فلمی سفر کا آغاز ہوا۔
فیسٹیول میں موجود معروف ہدایت کاروں اور پروڈیوسرز نے ان سے فلموں میں کام کی پیشکش کی، اور یوں کلاڈیا جلد ہی یورپ بھر میں مشہور ہو گئیں۔

چیلنجز سے بھرپور زندگی:

غیر ملکی میڈیا رپورٹس کے مطابق، کلاڈیا کارڈینال کی ذاتی زندگی کئی تلخ تجربات سے گزری۔ نوعمری میں انہیں جنسی زیادتی کا سامنا کرنا پڑا، جس کے بعد انہوں نے لندن میں خفیہ طور پر اپنے بیٹے کو جنم دیا۔
کئی برسوں تک وہ اپنے بیٹے کو عوامی طور پر اپنا چھوٹا بھائی ظاہر کرتی رہیں تاکہ فلمی دنیا میں اپنے مقام کو متاثر ہونے سے بچا سکیں۔

فنی خدمات:

کلاڈیا کارڈینال نے متعدد یادگار فلموں میں کام کیا، جن میں

The Leopard

8½

Once Upon a Time in the West

Rocco and His Brothers
شامل ہیں۔ ان کا شمار ان اداکاراؤں میں ہوتا ہے جنہوں نے 1960 اور 70 کی دہائی میں یورپی سینما کو عالمی سطح پر متعارف کرانے میں اہم کردار ادا کیا۔

دنیا بھر سے خراجِ عقیدت:

ان کے انتقال پر دنیا بھر سے فنکاروں، فلم بینوں اور مداحوں کی جانب سے گہرے دکھ اور خراجِ عقیدت کا اظہار کیا جا رہا ہے۔ انہیں ایک باوقار، باہمت اور بے مثال فنکارہ کے طور پر یاد کیا جا رہا ہے۔