دلجیت دوسانجھ کا فخر سے لبریز بیان: "میں پنجابی ہوں، مجھے کسی سپر اسٹار کی ضرورت نہیں”

ممبئی / لاہور: مشہور بھارتی پنجابی گلوکار و اداکار دلجیت دوسانجھ نے اپنے ایک پرانے انٹرویو میں صاف الفاظ میں کہا ہے کہ انہیں بالی ووڈ میں کام کرنے یا سپر اسٹار بننے کا کوئی شوق نہیں، کیونکہ وہ اپنی شناخت اور فن پر فخر کرتے ہیں۔

ان کا یہ کلپ سوشل میڈیا پر وائرل ہو رہا ہے، جس میں دلجیت یہ کہتے نظر آتے ہیں:
"میں گلوکار ہوں، اور مجھے گانے سے کوئی نہیں روک سکتا، کیونکہ میں پنجاب سے ہوں، جہاں لوگ خود گانے لکھتے، بناتے اور گاتے ہیں۔ ہمیں کسی بڑے نام کی ضرورت نہیں۔”

فن سے محبت اور خود پر اعتماد کی مثال
دلجیت دوسانجھ کے اس بیان کو مداحوں کی بڑی تعداد سراہ رہی ہے، کیونکہ یہ فن کے وقار، ثقافتی جڑوں اور خود اعتمادی کی خوبصورت ترجمانی ہے۔ اُنہوں نے یہ ثابت کیا ہے کہ اصل کامیابی خود کو پہچاننے اور اپنی شناخت پر فخر کرنے میں ہے۔

ہانیہ عامر کے ساتھ فلم پر بھارتی تنقید، پاکستانی محبت
یہ ویڈیو ایک ایسے وقت میں دوبارہ منظرِ عام پر آئی ہے جب دلجیت کو اپنی نئی فلم سردار جی 3 میں پاکستانی اداکارہ ہانیہ عامر کے ساتھ کام کرنے پر بھارت میں بعض حلقوں کی جانب سے تنقید کا سامنا ہے۔ تاہم پاکستان میں اُن کی اس فلمی جوڑی کو بھرپور پذیرائی مل رہی ہے۔

پاکستانی شائقین نے نہ صرف دلجیت کی فنکارانہ صلاحیتوں کو سراہا بلکہ ہانیہ کے ساتھ اُن کی کیمسٹری کو بھی بے حد پسند کیا ہے۔ سوشل میڈیا پر صارفین نے دونوں فنکاروں کے درمیان ثقافتی ہم آہنگی کو خوش آئند قرار دیا ہے۔

فن کی کوئی سرحد نہیں
دلجیت دوسانجھ کا مؤقف، پاکستان میں بڑھتی مقبولیت، اور دونوں ملکوں کے فنکاروں کا ایک ساتھ کام کرنا اس بات کا ثبوت ہے کہ فن اور موسیقی دلوں کو جوڑنے کی طاقت رکھتے ہیں۔