یاسر حسین کی والدہ کے ایصالِ ثواب کے لیے لگائی گئی پانی کی ٹنکی نے دل جیت لیے، سوشل میڈیا پر جذباتی پوسٹ وائرل

کراچی (شوبز ڈیسک) — پاکستان کے معروف اداکار، ہدایت کار اور میزبان یاسر حسین نے حال ہی میں انسٹاگرام پر ایک جذباتی پوسٹ شیئر کی، جس میں انہوں نے اپنی مرحومہ والدہ کی قبر پر حاضری کے موقع پر پیش آنے والا روح پرور واقعہ مداحوں سے شیئر کیا۔

یاسر حسین نے بتایا کہ شدید گرمی کے دن جب وہ والدہ کی قبر پر گئے تو وہاں ایک پانی کی ٹنکی پر نظر پڑی، جس پر ان کی والدہ کا نام "زوجہ خادم حسین” درج تھا۔ یہ ٹنکی پانچ سال قبل ان کے اہل خانہ نے ایصالِ ثواب کے لیے لگوائی تھی، اور آج بھی وہ لوگوں کے لیے زندگی کا ذریعہ بنی ہوئی ہے۔

اداکار نے کہا کہ جب انہوں نے بچوں اور راہ گیروں کو اس ٹنکی سے پانی پیتے اور بوتلیں بھرتے دیکھا تو ان کا دل خوشی، شکر اور روحانی سکون سے بھر گیا۔
انہوں نے لکھا:

"یہ نیکی کا ایک چھوٹا سا کام تھا جو وقت کے ساتھ بھول گیا، مگر آج اس کے اثرات نے دل کو چھو لیا۔ اب میں چاہتا ہوں کہ اس طرح کے کام جاری رکھوں اور دوسروں کو بھی اس کی ترغیب دوں۔”

یاسر حسین نے پوسٹ کے آخر میں مداحوں سے بھی نیکی کے ایسے کام کرنے کی اپیل کی اور کہا کہ "ایصالِ ثواب صرف دعاؤں تک محدود نہیں، عملی نیکی بھی صدقۂ جاریہ بن سکتی ہے۔”

یاسر کی پوسٹ پر سوشل میڈیا صارفین نے بھرپور محبت کا اظہار کیا، انہیں دعاؤں سے نوازا اور اس نیک عمل کی تعریف کی۔ کئی مداحوں نے لکھا کہ وہ بھی اب والدین کے لیے اسی طرح کا کوئی کارِ خیر انجام دینے کا ارادہ رکھتے ہیں۔