ہانیہ عامر طلحہ انجم پر کانسرٹ میں بوتل پھینکنے کے واقعے پر برہم: "آرٹسٹ جنگ کا ہدف نہیں ہوتا”
لاہور: پاکستان کی معروف اداکارہ ہانیہ عامر نے حالیہ کانسرٹ کے دوران ریپر طلحہ انجم پر بوتل پھینکے جانے کے واقعے پر سخت ردعمل دیتے ہوئے اسے "غیر انسانی اور قابلِ مذمت عمل” قرار دیا ہے۔
واقعہ اس وقت پیش آیا جب طلحہ انجم ایک میوزیکل ایونٹ میں اسٹیج پر پرفارم کر رہے تھے کہ اچانک ایک شائق کی جانب سے ان پر پانی کی بوتل پھینکی گئی۔ طلحہ نے سیکیورٹی گارڈ کو فوری طور پر اس شخص کو باہر نکالنے کی ہدایت کی۔
ہانیہ عامر کا دوٹوک موقف
اداکارہ ہانیہ عامر نے انسٹاگرام پر اسٹوری شیئر کرتے ہوئے اس حرکت کو "فنکار کی توہین” قرار دیا۔ انہوں نے لکھا:
"پرفارمنس کے دوران کسی آرٹسٹ پر چیز پھینکنا نہ صرف بےعزتی ہے بلکہ یہ غیر انسانی فعل ہے۔ آپ آرٹ کا مطالبہ نہیں کر سکتے اگر آپ عزت کی پیشکش نہیں کرتے۔”
ہانیہ نے مزید کہا:
"طلحہ انجم اسٹیج پر جچتا ہے، میدان جنگ میں نہیں۔ ہجوم کو ذمہ دار ٹھہرائیں، فنکار کو نہیں۔ اگر ہم اپنے آرٹسٹ کو محفوظ نہیں رکھ سکتے، تو ہم ان کے قابل نہیں ہیں۔”
انہوں نے اپنی بات کا اختتام کرتے ہوئے کہا:
"طلحہ انجم ایک آرٹسٹ ہے، کوئی ٹارگٹ نہیں۔ ایک مشہور شخصیت کو کچھ عزت دو۔”
سوشل میڈیا پر ردعمل
سوشل میڈیا صارفین کی جانب سے بھی ہانیہ عامر کے بیان کو خوب سراہا جا رہا ہے۔ بیشتر افراد نے اس بات پر زور دیا کہ فنکاروں کی عزت اور سیکیورٹی یقینی بنانا ہر ایونٹ آرگنائزر اور شائق کا اخلاقی فرض ہے۔
طلحہ انجم کی خاموشی
واقعے کے بعد طلحہ انجم کی جانب سے تاحال کوئی تفصیلی ردعمل سامنے نہیں آیا، تاہم ان کے مداحوں کی بڑی تعداد ان کے حق میں آواز بلند کر رہی ہے۔
