💍 محبت کی جیت: حنا خان اور راکی جیسوال 13 سال بعد شادی کے بندھن میں بندھ گئے!
ممبئی: بھارتی شوبز انڈسٹری کی باہمت اور باوقار اداکارہ حنا خان نے آخرکار اپنی طویل مدتی محبت راکی جیسوال کے ساتھ زندگی بھر کے رشتے میں بندھ کر مداحوں کو خوشی سے سرشار کر دیا۔ یہ دل خوش کر دینے والی خبر حنا خان نے خود انسٹاگرام پر دلکش تصاویر کے ساتھ مداحوں سے شیئر کی۔
اداکارہ نے اپنی پوسٹ میں نہ صرف محبت کا جشن منایا بلکہ ان لمحوں کی جھلک دکھائی جن کا انتظار مداحوں کو برسوں سے تھا۔ سفید لباس، سادگی اور محبت کی جھلک لیے یہ تصویریں ہزاروں دلوں کو چھو گئیں۔ مداحوں اور شوبز ستاروں نے انہیں زندگی کے اس نئے سفر کے لیے بے شمار دعاؤں سے نوازا۔
حنا خان پاکستان میں بھی خاصی مقبول ہیں۔ ان کے مشہور ڈرامے "یہ رشتہ کیا کہلاتا ہے” اور "کسوٹی زندگی کی” سمیت ریئلٹی شوز "بگ باس” اور "خطروں کے کھلاڑی” نے انہیں سرحد پار بھی ایک مقبول چہرہ بنا دیا۔ انسٹاگرام پر ان کے 20 ملین سے زائد فالوورز اس بات کا ثبوت ہیں کہ ان کی فین فالوونگ عالمی ہے۔
حنا کی زندگی کا ایک اور قابلِ ستائش پہلو ان کی کینسر سے جرأت مندانہ جنگ ہے۔ اسٹیج تھری بریسٹ کینسر جیسے چیلنج کے باوجود انہوں نے حوصلے، ہمت اور وقار کی نئی مثال قائم کی، اور اس مشکل وقت میں راکی جیسوال کا بے لوث ساتھ ہمیشہ ان کے ساتھ رہا۔
حنا اور راکی کی 13 سالہ رفاقت آج ایک خوبصورت بندھن میں تبدیل ہو گئی، جو اس بات کا ثبوت ہے کہ سچی محبت وقت اور آزمائشوں سے گزر کر بالآخر منزل پا ہی لیتی ہے۔
