حرا مانی کا جذباتی پیغام وائرل: "ہم جنگ نہیں چاہتے، ہم بچوں والے لوگ ہیں”
ابوظہبی/کراچی: پاکستانی ڈرامہ انڈسٹری کی معروف اداکارہ حرا مانی کی ابوظبی ایئرپورٹ سے شیئر کی گئی جذباتی ویڈیو نے سوشل میڈیا صارفین کے دل جیت لیے۔ ویڈیو میں اداکارہ نے نہ صرف اپنے دل کی بات کی بلکہ جنگ سے متاثرہ پاکستانیوں کے درد کو بھی آواز دی۔
اداکارہ نے انکشاف کیا کہ وہ حال ہی میں ابوظبی ایئرپورٹ پر اس وقت پھنس گئیں جب پاکستان کی فضائی حدود بند کر دی گئی تھیں۔ اس لمحے انہوں نے شدید جذباتی کیفیت محسوس کی اور خدشہ ظاہر کیا کہ شاید وہ اپنے بچوں کو دوبارہ نہ دیکھ سکیں۔ حرا نے کہا، "ہم جنگ نہیں چاہتے، ہم بچوں والے لوگ ہیں۔”
حرا مانی نے انسٹاگرام پر پوسٹ کی گئی ویڈیو میں جنگ کے باعث متاثر ہونے والے خاندانوں کے لیے ہمدردی اور دعاؤں کا اظہار کیا اور کہا کہ وہ صرف اپنا دل ہلکا کرنا چاہتی تھیں۔ ان کے جذباتی پیغام نے ہزاروں سوشل میڈیا صارفین کو متاثر کیا، جنہوں نے ان کے ساتھ بھرپور یکجہتی اور ہمدردی کا اظہار کیا۔
ویڈیو کے آخر میں حرا مانی نے "پاکستان زندہ باد” کا نعرہ لگایا اور ملک میں پائیدار امن کی دعا کی۔ ان کی یہ سچائی اور خلوص دل سے کی گئی باتیں نہ صرف مداحوں بلکہ عام عوام کے دلوں کو بھی چھو گئیں۔
اداکارہ کا یہ پیغام اس بات کی غمازی کرتا ہے کہ فنکار نہ صرف اسٹیج یا اسکرین پر اپنی صلاحیتوں کا مظاہرہ کرتے ہیں بلکہ معاشرتی اور قومی مسائل پر بھی اپنی ذمہ داری محسوس کرتے ہیں۔
