برطانیہ کی ایپل اور گوگل سے فحش مواد دکھانے سے روکنے کی تجویز

لندن: تازہ ترین رپورٹ میں انکشاف کیا گیا ہے کہ ایپل اور گوگل جلد ہی اپنے آپریٹنگ سسٹمز میں ایسا الگوردم شامل کریں گے جو فحش مواد کی خودکار نشان دہی کر سکے گا۔

رپورٹ کے مطابق برطانوی حکومت خواتین اور لڑکیوں کے خلاف تشدد کی روک تھام کے لیے ان کمپنیوں کو فحش مواد کو موبائل اور ڈیسک ٹاپ ڈیوائسز پر دکھنے سے روکنے کی تجویز دینے والی ہے۔

ابتدائی طور پر اس تبدیلی کا اطلاق موبائل ڈیوائسز پر متوقع ہے، تاہم اس دائرہ کار کو بعد میں ڈیسک ٹاپ ڈیوائسز تک وسعت دی جا سکتی ہے۔

ایپل اس وقت کمیونیکیشن سیفٹی ٹولز فراہم کر رہا ہے، جنہیں والدین فعال کر سکتے ہیں۔ یہ ٹولز میسجز، ایئر ڈراپ اور فیس ٹائم جیسی ایپس میں فحش تصاویر اور ویڈیوز کی خودکار نشان دہی کر سکتے ہیں۔

تاہم نوجوان صارفین انتباہ کو نظر انداز کرتے ہوئے فلیگڈ تصاویر دیکھ سکتے ہیں، اور 13 سال سے کم عمر افراد کے لیے پاسکوڈ کا استعمال لازمی ہے۔

واضح رہے کہ یہ تجویز باضابطہ طور پر چند دنوں میں پیش کر دی جائے گی۔