واٹس ایپ نے آئی فون صارفین کے لیے ملٹی اکاؤنٹ فیچر متعارف کروا دیا

واٹس ایپ نے آئی فون صارفین کے لیے نیا اور انتہائی مفید فیچر متعارف کروا دیا ہے، جس کے ذریعے اب ایک ہی ڈیوائس پر دو مختلف فون نمبرز کے واٹس ایپ اکاؤنٹس بیک وقت استعمال کیے جا سکیں گے۔
کمپنی کے مطابق اس فیچر کے تحت ہر اکاؤنٹ کی چیٹ ہسٹری، نوٹیفیکیشنز، پروفائل سیٹنگز اور پرائیویسی مکمل طور پر الگ ہوگی۔ صارفین سیٹنگز مینو میں موجود اکاؤنٹ لسٹ کے ذریعے چند لمحوں میں ایک اکاؤنٹ سے دوسرے پر سوئچ کر سکیں گے۔
واٹس ایپ کا کہنا ہے کہ یہ فیچر ان صارفین کے لیے خاص طور پر فائدہ مند ہے جو ذاتی اور کام کے نمبرز ایک ہی آئی فون پر استعمال کرنا چاہتے ہیں، اس طرح انہیں اضافی فون یا بزنس واٹس ایپ رکھنے کی ضرورت نہیں رہے گی۔
نیا ملٹی اکاؤنٹ فیچر فی الحال iOS بیٹا ورژن 25.34.10.72 یا اس کے بعد کے ورژنز میں دستیاب ہے۔ اکاؤنٹس کے درمیان سوئچ کرتے وقت نوٹیفیکیشنز واضح طور پر بتائیں گے کہ کس اکاؤنٹ پر پیغام موصول ہوا ہے۔
سیکیورٹی کے لیے Face ID اور Touch ID جیسی توثیقی سہولتیں بھی فعال رہیں گی، تاکہ صارف کا ڈیٹا محفوظ رہے۔