ویب ڈیسک:
سابق بھارتی آف اسپنر ہربھجن سنگھ نے آئی سی سی مینز ٹی20 ورلڈ کپ 2026 کے ممکنہ سیمی فائنلسٹ ٹیموں کے حوالے سے اپنی پیشگوئی کر دی ہے۔ ٹی20 ورلڈ کپ 7 فروری 2026 سے شروع ہوگا، جس کی مشترکہ میزبانی بھارت اور سری لنکا کریں گے۔
ہربھجن سنگھ نے حیران کن طور پر انگلینڈ کو اپنی پسندیدہ ٹیموں میں شامل نہیں کیا، حالانکہ یہ ٹیم دو مرتبہ کی عالمی چیمپئن ہے۔ ان کا کہنا تھا کہ انگلینڈ کے پاس مضبوط ٹیم ہونے کے باوجود اس بار سیمی فائنل تک رسائی مشکل ہو سکتی ہے۔
انہوں نے بھارت کو ہوم گراؤنڈ کا فائدہ قرار دیتے ہوئے کہا کہ بھارتی ٹیم مقامی کنڈیشنز سے بخوبی واقف ہے اور یہی چیز اسے دیگر ٹیموں پر برتری دیتی ہے۔ تاہم ہربھجن کے مطابق بھارت کی کامیابی کا دار و مدار اس بات پر ہوگا کہ وہ ورلڈ کپ کے دباؤ کو کس حد تک بہتر انداز میں سنبھال پاتے ہیں۔
ہربھجن سنگھ نے بھارت کے علاوہ آسٹریلیا اور جنوبی افریقہ کو بھی سیمی فائنل کے مضبوط امیدوار قرار دیا، جبکہ چوتھی ٹیم کے طور پر انہوں نے افغانستان کا انتخاب کیا۔ انہوں نے سابق چیمپئن ویسٹ انڈیز (2012 اور 2016 کے فاتح) کو اپنی فہرست سے خارج کر دیا۔
ہربھجن نے کہا:
"میرے خیال میں بھارت کے پاس ٹی20 ورلڈ کپ جیتنے کا بہترین موقع ہے۔ وہ ایک مضبوط ٹیم ہے اور اپنے ہوم کنڈیشنز میں کھیل رہی ہے، جس سے انہیں دیگر ٹیموں پر برتری حاصل ہے۔ لیکن ورلڈ کپ کا دباؤ ایک ایسا عنصر ہے جسے وہ دیگر ٹیموں سے بہتر طریقے سے سنبھالیں، اور یہی سب سے اہم بات ہے۔”
