پاکستان کے لیجنڈ کرکٹر اور سابق ٹیسٹ کپتان جاوید میانداد کو دل میں معمولی تکلیف کے باعث اسپتال منتقل کیا گیا، تاہم ڈاکٹرز نے معائنے کے بعد انہیں گھر جانے کی اجازت دے دی۔
ذرائع کے مطابق 68 سالہ جاوید میانداد معمول کے مطابق معائنے کے لیے قومی ادارہ امراض قلب (این آئی سی وی ڈی)، کراچی پہنچے۔ معالجین نے ضروری ٹیسٹ اور اینجیوگرافی کے بعد ان کی صحت کو تسلی بخش قرار دیا اور کچھ ادویات کے ساتھ آرام کی ہدایت بھی دی۔
جاوید میانداد نے اسپتال میں فراہم کی گئی سہولیات پر اطمینان کا اظہار کیا اور گھر روانگی سے قبل کہا کہ "میں بہت بہتر محسوس کر رہا ہوں، اللہ کا کرم اور قوم کی دعائیں شامل حال رہیں تو صحت میں مزید بہتری آئے گی۔”
ذرائع کا کہنا ہے کہ سابق ٹیسٹ کپتان کی یہ اسپتال آمد محض معمولی شکایت کے پیشِ نظر تھی اور انہیں کسی سنگین مسئلے کا سامنا نہیں تھا۔
