واشنگٹن: امریکا کے صدر ڈونلڈ ٹرمپ نے اعلان کیا ہے کہ تھائی لینڈ اور کمبوڈیا کے سربراہان نے کئی روز سے جاری سرحدی تصادم کے بعد بالآخر جنگ بندی بحال کرنے پر اتفاق کر لیا ہے۔
صدر ڈونلڈ ٹرمپ نے تھائی لینڈ کے وزیراعظم اینوٹن چیرنویراکول اور کمبوڈیا کے وزیراعظم ہون مینیٹ سے ٹیلیفونک رابطے کے بعد جنگ بندی کے معاہدے کا اعلان اپنے سوشل میڈیا پلیٹ فارم ٹرتھ سوشل پر کیا۔ اپنے بیان میں انہوں نے کہا کہ دونوں ممالک مکمل جنگ بندی پر متفق ہو گئے ہیں، جس کا اطلاق آج شام سے ہوگا۔
امریکی صدر کے مطابق جنگ بندی پر عمل درآمد ملائیشیا کے وزیراعظم انوار ابراہیم کی معاونت سے طے پانے والے ابتدائی امن معاہدے کے تحت کیا جائے گا۔ ٹرمپ نے کہا کہ انوار ابراہیم نے ایک بار پھر تھائی لینڈ اور کمبوڈیا کو فائر بندی پر آمادہ کرنے میں اہم کردار ادا کیا ہے۔
صدر ٹرمپ نے کہا کہ تھائی لینڈ اور کمبوڈیا کے وزرائے اعظم کے ساتھ مل کر کام کرنا ان کے لیے باعثِ فخر ہے، کیونکہ اس کے ذریعے دو خوشحال اور شاندار ممالک کے درمیان ممکنہ سنگین جنگی تصادم کو روکا جا سکا ہے۔
واضح رہے کہ رواں برس جولائی میں ملائیشیا کے وزیراعظم انوار ابراہیم کی ثالثی اور امریکی صدر ڈونلڈ ٹرمپ کی کوششوں سے دونوں ممالک کے درمیان جنگ بندی معاہدہ طے پایا تھا، جس کے نتیجے میں سرحد پر امن قائم ہوا تھا۔ اس معاہدے کی مزید تفصیلات اکتوبر میں اس وقت سامنے آئی تھیں جب ڈونلڈ ٹرمپ نے ملائیشیا میں منعقدہ علاقائی سربراہی اجلاس میں شرکت کی تھی۔
تاہم امن معاہدے کے باوجود تھائی لینڈ اور کمبوڈیا کے تعلقات کشیدہ رہے اور گزشتہ ہفتے ایک بار پھر جھڑپیں شروع ہو گئی تھیں۔ دونوں ممالک ایک دوسرے کے خلاف سخت بیانات اور پروپیگنڈا مہم بھی چلاتے رہے ہیں۔
دونوں ملکوں کے درمیان تنازع تاریخی طور پر سرحدی علاقوں پر دعوؤں کی بنیاد پر ہے، جو بڑی حد تک 1907 میں تیار کیے گئے نقشے سے جڑا ہوا ہے۔ اس وقت کمبوڈیا فرانس کی نوآبادیات تھا، جبکہ تھائی لینڈ اس نقشے کو غلط قرار دیتا ہے۔
علاوہ ازیں 1962 میں عالمی عدالتِ انصاف کے فیصلے کے بعد بھی کشیدگی میں اضافہ ہوا تھا، جس میں کمبوڈیا کی خودمختاری کو تسلیم کیا گیا، تاہم تھائی لینڈ میں آج بھی اس فیصلے کو مکمل طور پر قبول نہیں کیا جاتا۔
