اقوام متحدہ نے عمران خان کی جیل میں مبینہ بدسلوکی پر تشویش کا اظہار کیا

اسلام آباد: اقوام متحدہ کے خصوصی نمائندے نے خبردار کیا ہے کہ پاکستان میں پی ٹی آئی کے بانی اور سابق وزیر اعظم عمران خان کو ایسے حالات میں رکھا جا رہا ہے جو غیر انسانی یا توہین آمیز سلوک کے زمرے میں آ سکتے ہیں۔ انہوں نے پاکستانی حکام سے مطالبہ کیا ہے کہ وہ عالمی اصولوں اور معیارات کے مطابق ان کی نظربندی کے حالات کو یقینی بنائیں۔

غیر ملکی خبر رساں اداروں کی رپورٹس کے مطابق ستمبر میں قانونی ٹیم نے پاکستانی حکومت سے عمران خان اور ان کی اہلیہ بشریٰ بی بی کے ساتھ مبینہ بدسلوکی کو روکنے کے لیے اقوام متحدہ کے نمائندے سے رابطہ کیا تھا۔

تاہم وزیراعظم کے معاون رانا احسان افضل نے اقوام متحدہ کے خدشات کو مسترد کرتے ہوئے کہا کہ عمران خان کو جیل کے قوانین اور مینوئل کے مطابق رکھا جا رہا ہے۔ انہوں نے مزید کہا کہ "ان کے بچوں کو ان تک رسائی حاصل ہے اور کال کے لیے وقت طے کرنا چاہیے۔ حکومت کی طرف سے کوئی رکاوٹ نہیں ہے۔”

انہوں نے کہا کہ عمران خان کو بی کلاس قیدی کی حیثیت سے ان کے حقوق سے زیادہ سہولیات فراہم کی جا رہی ہیں، جیسے ورزش کی سہولیات، اچھا کھانا اور کافی جگہ۔

اقوام متحدہ کی عہدیدار ایلس جل ایڈورڈز نے پاکستان پر زور دیا کہ وہ 73 سالہ عمران خان کی حراست کے حالات کے حوالے سے ملنے والی رپورٹس پر فوری اور مؤثر کارروائی کرے۔ انہوں نے کہا کہ 26 ستمبر 2023 کو راولپنڈی کی اڈیالہ جیل منتقل ہونے کے بعد سے عمران خان کو مبینہ طور پر حد سے زیادہ قید تنہائی میں رکھا گیا، انہیں دن میں 23 گھنٹے سیل میں رکھا جاتا رہا اور بیرونی دنیا تک رسائی انتہائی محدود رہی، جبکہ ان کے سیل پر مبینہ طور پر مسلسل کیمرے سے نگرانی کی گئی۔

ایلس جل ایڈورڈز نے مزید کہا کہ "عمران خان کی قید تنہائی کو فوری طور پر ختم کیا جانا چاہیے۔” انہوں نے واضح کیا کہ خصوصی نمائندے آزاد ماہرین ہوتے ہیں اور انسانی حقوق کونسل کے مینڈیٹ کے تحت کام کرتے ہیں، لیکن وہ اقوام متحدہ کی طرف سے براہ راست بات نہیں کرتے۔

عمران خان کے حامیوں کا الزام ہے کہ ان کے وکلا اور اہل خانہ کو ان سے ملاقات سے روکا جا رہا ہے۔ ان کے خلاف جیل کے باہر متعدد احتجاج اور دھرنے بھی کیے گئے ہیں۔