واشنگٹن: امریکا میں موجود افغان شہریوں سے متعلق تشویشناک انکشاف سامنے آیا ہے۔ امریکی نیشنل انٹیلی جنس کی ڈائریکٹر تلسی گبارڈ نے کہا ہے کہ امریکا آنے والے افغان شہریوں میں سے 2 ہزار کے دہشت گرد تنظیموں سے براہ راست یا ممکنہ روابط سامنے آئے ہیں۔
امریکی میڈیا کو دیے گئے انٹرویو میں تلسی گبارڈ نے بائیڈن انتظامیہ کے دور میں افغان شہریوں کی جانچ پڑتال کے عمل پر شدید تنقید کرتے ہوئے کہا کہ آپریشن الائیز ویلکم کے تحت 18 ہزار افغان شہری امریکا میں داخل ہوئے، تاہم ان کی مناسب اور مؤثر جانچ نہیں کی گئی۔
انہوں نے کہا کہ موجودہ حکام کی جانب سے آپریشن الائیز ویلکم کے تحت امریکا آنے والے ہر افغان شہری کا ازسرنو اور باریک بینی سے جائزہ لیا جا رہا ہے، اس سلسلے میں تمام متعلقہ ادارے متحرک ہیں۔
تلسی گبارڈ کے مطابق داعش اور دیگر دہشت گرد تنظیمیں مسلسل امریکی سرزمین پر حملوں کی منصوبہ بندی میں مصروف ہیں اور یہ تنظیمیں امریکا میں ایسے افراد کی تلاش میں ہیں جو ان کے مقاصد کے لیے استعمال ہو سکیں۔ انہوں نے کہا کہ اسی وجہ سے امریکی ادارے اس خطرے کو نہایت سنجیدگی سے لے رہے ہیں۔
امریکی نیشنل انٹیلی جنس ڈائریکٹر نے مزید کہا کہ گزشتہ چند برسوں کے دوران غیر قانونی طور پر امریکا آنے والوں کی تعداد میں بھی نمایاں اضافہ ہوا ہے، جو قومی سلامتی کے لیے ایک بڑا چیلنج بن چکا ہے۔
