لندن: برطانیہ کے وزیراعظم سر کیئر اسٹارمر نے ملک بھر میں بچوں کے جنسی استحصال میں ملوث گرومنگ گینگز کے خلاف ایک بااختیار قومی انکوائری کا اعلان کر دیا ہے، جسے قانونی دائرہ اختیار کے تحت Inquiries Act کے تحت عمل میں لایا جائے گا۔
یہ فیصلہ ممتاز محقق لوئز کیسی کی تازہ رپورٹ کے بعد کیا گیا، جس میں ملک کے مختلف حصوں میں نابالغ بچوں — خاص طور پر لڑکیوں — کے استحصال سے متعلق کئی سنگین حقائق سامنے لائے گئے تھے۔
وزیراعظم اسٹارمر نے رپورٹ پر اپنے ردعمل میں کہا:
"میں نے لوئز کیسی کی رپورٹ کا ہر لفظ پڑھا ہے، اور میں ان کی سفارشات سے مکمل اتفاق کرتا ہوں۔ اب وقت آ گیا ہے کہ ہم ان پر عمل کریں اور متاثرہ خاندانوں کو انصاف فراہم کریں۔ یہ درست اور بروقت اقدام ہے۔”
ان کا کہنا تھا کہ انکوائری کے طریقہ کار، دائرہ کار اور قیادت کا تعین جلد کیا جائے گا تاکہ مکمل شفافیت اور احتساب کو یقینی بنایا جا سکے۔
یہ پیش رفت ایسے وقت پر ہوئی ہے جب ماضی میں کیئر اسٹارمر نے ایک نئی قومی انکوائری کے مطالبے کو یہ کہہ کر مسترد کیا تھا کہ اس سے متاثرین کے لیے انصاف میں تاخیر ہو سکتی ہے، اور توجہ پہلے سے موجود رپورٹس پر عملدرآمد پر ہونی چاہیے۔
تاہم، لوئز کیسی کی رپورٹ کے بعد عوامی دباؤ اور متاثرین کی آواز سننے کے بعد وزیراعظم نے اپنا موقف تبدیل کرتے ہوئے ایک باضابطہ، آزادانہ اور مکمل قومی انکوائری کا اعلان کیا ہے، جسے انسانی حقوق اور بچوں کے تحفظ کی سمت میں ایک بڑی پیش رفت قرار دیا جا رہا ہے۔
تجزیہ کاروں کے مطابق یہ فیصلہ نہ صرف انصاف کی فراہمی بلکہ عوامی اعتماد کی بحالی میں اہم کردار ادا کرے گا، اور برطانیہ میں بچوں کے تحفظ سے متعلق پالیسیوں پر مثبت اثر ڈالے گا۔
