پاکستان کرکٹ بورڈ (پی سی بی) نے 7 دسمبر کو لندن کے تاریخی لارڈز کرکٹ گراؤنڈ میں پی ایس ایل کی پروموشن کے لیے روڈ شو کرنے کا اعلان کیا ہے۔ یہ ایونٹ سہ پہر 3 بجے شروع ہوگا اور شائقین کو پی ایس ایل کے کرکٹ ستاروں سے ملنے کا سنہری موقع فراہم کرے گا۔
اس روڈ شو میں عالمی سرمایہ کاروں، کمرشل پارٹنرز اور شائقین کی بڑی تعداد کی شرکت متوقع ہے، اور شائقین اپنے پسندیدہ کرکٹ ستاروں کو ایک ساتھ دیکھ سکیں گے۔ اس شو میں شرکت کرنے والے نمایاں کھلاڑیوں میں بابر اعظم، حارث رؤف، صاحبزادہ فرحان، وسیم اکرم، رمیز راجہ اور گلوکار علی ظفر شامل ہیں۔
پی ایس ایل کے سی ای او کے مطابق، اس روڈ شو میں 30 سپر فینز کو خصوصی طور پر شرکت کا موقع دیا جائے گا، تاکہ وہ اس منفرد ایونٹ کا حصہ بن سکیں اور اپنے پسندیدہ کرکٹرز سے ملاقات کرسکیں۔
یہ روڈ شو پی ایس ایل کی عالمی سطح پر مقبولیت کو مزید بڑھانے کے لیے ایک اہم قدم ثابت ہوگا، خاص طور پر لندن میں پاکستانی کمیونٹی اور کرکٹ شائقین کے لیے ایک دلکش موقع ہوگا۔
