ایشیز سیریز کے دوسرے ٹیسٹ میچ سے قبل انگلینڈ کی ٹیم کو بڑا دھچکا لگا ہے، کیونکہ تیز رفتار فاسٹ بولر مارک ووڈ بریسبین میں شیڈول میچ میں ٹیم کا حصہ نہیں ہوں گے۔
ٹیم مینجمنٹ نے ان کی فٹنس کو مدنظر رکھتے ہوئے فیصلہ کیا ہے کہ انہیں سیریز کے باقی میچز کے لیے احتیاط کے ساتھ استعمال کیا جائے، تاکہ وہ مکمل طور پر فٹ رہیں اور زیادہ میچز کھیل سکیں۔
مارک ووڈ نے پرتھ میں کھیلے گئے پہلے ایشیز ٹیسٹ کے دوران تقریباً نو ماہ بعد بین الاقوامی کرکٹ میں واپسی کی تھی۔ وہ رواں برس مارچ میں گھٹنے کی سرجری کے بعد سے کھیل سے دور تھے، جبکہ ان کا آخری ٹیسٹ میچ اگست 2024 میں سری لنکا کے خلاف اولڈ ٹریفورڈ میں ہوا تھا۔
36 سالہ ووڈ نے پرتھ ٹیسٹ کے دوران ایک انٹرویو میں کہا تھا کہ وہ سیریز کے پانچوں ٹیسٹ کھیلنے کی پوزیشن میں نہیں ہیں۔ پہلے میچ میں بھی ہیمسٹرنگ کی تکلیف کے باعث ان کی شرکت مشکوک تھی، تاہم نیٹس میں فٹنس ثابت کر کے وہ میدان میں اترے اور شاندار رفتار کے ساتھ بولنگ کی۔
انگلینڈ کا مارک ووڈ کے حوالے سے احتیاط برتنا فطری ہے، کیونکہ وہ اپنی بہترین فارم میں دنیا کے چند تیز ترین بولرز میں شمار ہوتے ہیں جو 150 کلومیٹر فی گھنٹہ سے زائد کی رفتار سے گیند کر سکتے ہیں۔
