کیپ ٹاؤن (اسپورٹس ڈیسک) — ٹی ٹوئنٹی سیریز کے پہلے میچ سے قبل جنوبی افریقہ کے کپتان ڈونوون فریرا نے پاکستان کے خلاف ہونے والی سیریز کو نہایت اہم قرار دیا ہے۔
گزشتہ روز پریس کانفرنس کرتے ہوئے ڈونوون فریرا نے کہا کہ جنوبی افریقہ نے حالیہ دنوں میں ٹی ٹوئنٹی کرکٹ میں عمدہ کارکردگی دکھائی ہے، اور ٹیم میں ایسے بلے باز اور باؤلرز شامل ہیں جو کسی بھی ٹیم کے لیے خطرہ بن سکتے ہیں۔
جنوبی افریقی کپتان نے بتایا کہ انہوں نے اب تک پچ کا معائنہ نہیں کیا کیونکہ وہ پریکٹس سیشن میں شریک نہیں ہو سکے، تاہم ان کا کہنا تھا کہ “پہلی ایک دو گیندوں کے بعد اندازہ ہو جائے گا کہ پچ کس نوعیت کی ہے۔”
انہوں نے مزید کہا کہ پاکستان کے خلاف سیریز ورلڈ کپ کی تیاری کے لیے ایک بہترین موقع ہے، اور اگر ٹیم پہلا میچ جیتنے میں کامیاب ہو جائے تو اس سے پوری سیریز میں اعتماد اور تسلسل پیدا ہوگا۔
ڈونوون فریرا نے اس امید کا اظہار بھی کیا کہ جنوبی افریقہ اپنی حالیہ فارم کو برقرار رکھتے ہوئے پاکستان کے خلاف ایک مضبوط آغاز کرے گا۔
