دبئی: ایشیا کپ میں پاکستان اور متحدہ عرب امارات کے درمیان ہونے والے میچ سے قبل پیدا ہونے والی غیریقینی صورتحال ختم ہوگئی ہے۔ متنازع میچ ریفری اینڈی پائی کرافٹ کے معاملے پر پاکستان کرکٹ بورڈ (پی سی بی) اور انٹرنیشنل کرکٹ کونسل (آئی سی سی) کے درمیان معاملات طے پا گئے۔
ذرائع کے مطابق، اتوار کو پاک بھارت میچ کے دوران پیش آنے والے "نو ہینڈ شیک” کے واقعے پر پاکستان کرکٹ ٹیم نے شدید تحفظات کا اظہار کیا تھا۔ بعد ازاں، میچ ریفری اینڈی پائی کرافٹ نے اس واقعے پر باقاعدہ طور پر پاکستانی ٹیم سے معذرت کرلی۔
پی سی بی نے اس معاملے پر سخت مؤقف اختیار کرتے ہوئے آئی سی سی کو دو تحریری شکایتی خطوط ارسال کیے تھے، جن میں مطالبہ کیا گیا تھا کہ اگر میچ ریفری کے خلاف مناسب کارروائی نہ کی گئی تو پاکستان ٹیم ایشیا کپ کے بقیہ میچز کے بائیکاٹ پر غور کرے گی۔
اس دباؤ کے بعد آئی سی سی نے پی سی بی کے تحفظات کو سنجیدگی سے لیتے ہوئے ہنگامی مشاورت کی، جس کے بعد ریفری اینڈی پائی کرافٹ نے نہ صرف پاکستان ٹیم سے معافی مانگی بلکہ اپنے رویے پر ندامت کا اظہار بھی کیا۔
پی سی بی کے ایک اعلیٰ عہدیدار کے مطابق، ’’ہم آئی سی سی کی جانب سے فوری ردعمل اور ریفری کی معذرت کو سراہتے ہیں۔ اب ہم مکمل طور پر کھیل پر توجہ دینا چاہتے ہیں۔‘‘
مذکورہ پیشرفت کے بعد، پاکستان اور یو اے ای کے درمیان ہونے والا میچ طے شدہ شیڈول کے مطابق کھیلا جائے گا۔ ٹیم نے ہوٹل میں قیام کے بعد اسٹیڈیم جانے کی منظوری حاصل کرلی ہے۔
یہ واقعہ ایشیا کپ میں نہ صرف کرکٹ کے نظم و ضبط بلکہ کھلاڑیوں کے احترام کے حوالے سے بھی ایک اہم مثال بن گیا ہے۔
