پاکستانی بیٹیوں کا بڑا کارنامہ: ایشین یوتھ گرلز نیٹ بال چیمپئن شپ کا پلیٹ ڈویژن کپ جیت لیا

سیول (جنوبی کوریا): پاکستان کی نوجوان لڑکیوں کی نیٹ بال ٹیم نے شاندار کارکردگی کا مظاہرہ کرتے ہوئے ایشین یوتھ گرلز نیٹ بال چیمپئن شپ 2025 کے پلیٹ ڈویژن کا ٹائٹل اپنے نام کر لیا۔ فائنل میں پاکستان نے مالدیپ کو 60 کے مقابلے میں 35 گولز سے شکست دے کر ٹرافی پر قبضہ جما لیا۔

ناقابلِ شکست مہم، پاکستان کی 7 میں 7 فتوحات
پاکستانی ٹیم نے ٹورنامنٹ میں شاندار کارکردگی دکھاتے ہوئے تمام سات میچز جیتے اور پلیٹ ڈویژن میں ناقابلِ شکست رہ کر یہ اعزاز حاصل کیا۔ فائنل سمیت کسی بھی میچ میں حریف ٹیم کو برتری کا موقع نہیں دیا، جو ٹیم کی مضبوط حکمتِ عملی اور جذبے کا ثبوت ہے۔

سیمی فائنل میں جاپان کو شکست دے کر فائنل میں جگہ بنائی
اس سے قبل سیمی فائنل میں پاکستان نے جاپان کو 64-39 کے بڑے مارجن سے شکست دی تھی، جس کے بعد قومی ٹیم نے فائنل تک رسائی حاصل کی اور اپنا تسلط برقرار رکھا۔

نوجوان کھلاڑیوں کا جذبہ، پوری قوم کے لیے فخر
پاکستان نیٹ بال فیڈریشن اور کوچنگ اسٹاف نے اس کامیابی پر ٹیم کو مبارک باد دیتے ہوئے کہا کہ یہ کارنامہ نہ صرف کھیل کے میدان میں کامیابی ہے بلکہ پاکستان کی بیٹیوں کے لیے ایک روشن مثال بھی ہے کہ عالمی سطح پر وہ کسی سے کم نہیں۔

یہ جیت نہ صرف اسپورٹس میں پاکستان کی ترقی کی علامت ہے، بلکہ نوجوان لڑکیوں کی صلاحیتوں، محنت اور حوصلے کا منہ بولتا ثبوت بھی ہے۔