لاہور: پاکستان کرکٹ بورڈ (پی سی بی) نے قومی ٹیم کی کارکردگی میں بہتری کے لیے بیٹنگ، بولنگ، فیلڈنگ اور اسٹرنتھ اینڈ کنڈیشنگ کوچز کی نئی تقرریوں کا فیصلہ کر لیا ہے۔ اس حوالے سے پی سی بی نے باصلاحیت اور اہل امیدواروں سے 6 جون تک درخواستیں طلب کر لی ہیں۔
پی سی بی کے اعلامیے کے مطابق یہ فیصلہ مستقبل کے اہم دوروں اور ایونٹس کو مدنظر رکھتے ہوئے کیا گیا ہے تاکہ کھلاڑیوں کی تکنیکی اور جسمانی صلاحیتوں کو جدید تقاضوں کے مطابق بہتر بنایا جا سکے۔
یاد رہے کہ حالیہ دورۂ نیوزی لینڈ میں محمد یوسف بیٹنگ کوچ کے فرائض انجام دے چکے ہیں، جب کہ فیلڈنگ کوچ کی ذمہ داری محمد مسرور کے پاس تھی۔ اسٹرنتھ اینڈ کنڈیشنگ کوچ کے طور پر ڈرائیکس سائمن نے خدمات انجام دی تھیں۔
پاکستان کرکٹ بورڈ کا کہنا ہے کہ کوچنگ اسٹاف میں بہتری کا یہ عمل قومی ٹیم کو عالمی معیار کی تربیت فراہم کرنے کی طرف ایک اہم قدم ہے۔ نئے کوچز کی تقرریوں سے ٹیم کی کارکردگی میں تسلسل اور پیشہ ورانہ بہتری متوقع ہے۔
