اسلام آباد: پاکستان سپر لیگ (پی ایس ایل) کے 10ویں ایڈیشن کے بقیہ میچز کے لیے تیاریاں حتمی مرحلے میں داخل ہو گئی ہیں۔ ایونٹ کے آغاز میں صرف دو روز باقی رہ گئے ہیں، اور غیر ملکی کھلاڑیوں کی بروقت دستیابی کو یقینی بنانے کے لیے فرنچائزز کی بھرپور دوڑ جاری ہے۔
پی سی بی کی جانب سے آسٹریلیا، نیوزی لینڈ، انگلینڈ سمیت مختلف ممالک کے کرکٹ بورڈز سے کھلاڑیوں کے این او سی کے لیے رابطے کیے گئے ہیں۔ ان بورڈز کو یقین دلایا گیا ہے کہ خطے میں اب حالات مکمل طور پر پُرامن ہیں اور تمام کھلاڑیوں کی سیکیورٹی کو ترجیح دی گئی ہے۔
ری پلیسمنٹ ڈرافٹ متبادل طریقے سے مکمل
غیر ملکی کھلاڑیوں کی دستیابی میں حائل مشکلات کے باعث ری پلیسمنٹ ڈرافٹ گزشتہ روز مقررہ وقت پر مکمل نہ ہو سکا۔ تاہم، پی سی بی نے وقت کی کمی کو مدِنظر رکھتے ہوئے تمام ٹیموں سے ان کی ضرورت کے مطابق کھلاڑیوں کے نام باری باری لے کر انتخاب کیا۔ بیشتر ٹیموں نے پہلے سے طے شدہ متبادل کھلاڑیوں سے بھی براہِ راست بات چیت کی تھی۔
ٹیموں کی راولپنڈی آمد، ٹریننگ کا آغاز آج سے
تمام ٹیموں نے بدھ کی شام سے راولپنڈی پہنچنا شروع کر دیا ہے جہاں وہ آج سے اپنی ٹریننگ سیشنز کا آغاز کریں گی۔ زیادہ تر غیر ملکی کھلاڑیوں کی آمد جمعہ تک متوقع ہے، جس کے بعد اسکواڈز مکمل ہو جائیں گے۔
فرنچائزز کو مالی چیلنجز، پی سی بی سے تعاون کی امید
ایونٹ میں عارضی تعطل کے باعث فرنچائزز کو اضافی اخراجات کا سامنا کرنا پڑا، جن میں دبئی میں ہوٹل قیام، غیر ملکی کھلاڑیوں کی وطن واپسی کے ٹکٹس اور اب دوبارہ پاکستان آمد کے لیے مہنگی بزنس کلاس پروازیں شامل ہیں۔ اس حوالے سے بورڈ سے مالی معاونت پر بات چیت جاری ہے، اور ابتدائی طور پر یک طرفہ فضائی ٹکٹ کے اخراجات میں تعاون کی زبانی منظوری دی جا چکی ہے۔
منتظمین کو وقت کی کمی، سی ای او سلمان نصیر فرنٹ فٹ پر
پی ایس ایل کا مستقل اسٹاف نہ ہونے کے باعث موجودہ انتظامی بوجھ پی سی بی کے سی ای او سلمان نصیر نے سنبھال رکھا ہے۔ اُنہوں نے مختصر وقت میں تمام بڑے چیلنجز کا سامنا کرتے ہوئے ایونٹ کی بحالی کو ممکن بنایا، جو قابلِ تحسین اقدام ہے۔
بنگلہ دیش سیریز پر بھی پیش رفت، شیڈول کا اعلان متوقع
دوسری جانب پاکستان اور بنگلہ دیش کے درمیان متوقع ٹی20 سیریز کے معاملات بھی طے پا چکے ہیں۔ بنگلہ دیشی بورڈ کو اپنی حکومت سے حتمی اجازت کا انتظار ہے، تاہم دونوں ممالک کے خوشگوار تعلقات کے باعث کسی بڑی رکاوٹ کا سامنا نہیں۔ ذرائع کے مطابق نظرثانی شدہ شیڈول کے تحت پانچ ٹی20 میچز 27 مئی سے 5 جون تک کھیلے جائیں گے۔
پی سی بی اس سیریز کے شیڈول کا باضابطہ اعلان جمعرات یا جمعے کو متوقع ہے، جو شائقین کرکٹ کے لیے ایک اور خوشخبری ہو گی۔
