لاہور (اسپورٹس رپورٹر)
پاکستان کرکٹ ٹیم کے نئے ہیڈ کوچ کے اعلان کی تیاریاں حتمی مرحلے میں داخل ہو چکی ہیں۔ پاکستان کرکٹ بورڈ (پی سی بی) کی جانب سے اگلے ہفتے نئے کوچ کے نام کا باضابطہ اعلان کیے جانے کا قوی امکان ہے۔
ذرائع کے مطابق 4 مئی تک موصول ہونے والی درخواستوں کی اسکروٹنی مکمل کر لی گئی ہے، اور اب امیدواروں کو شارٹ لسٹ کرنے کا عمل جاری ہے۔ مجوزہ ناموں میں اسلام آباد یونائیٹڈ کے ہیڈ کوچ اور سابق نیوزی لینڈ کوچ مائیک ہیسن سرفہرست قرار دیے جا رہے ہیں۔
مائیک ہیسن کی پی سی بی حکام سے ابتدائی بات چیت ہو چکی ہے، جس میں انہوں نے اپنے ذاتی معاون اسٹاف کے ہمراہ کام کرنے کی خواہش ظاہر کی ہے۔ فی الحال پی سی بی اس شرط پر مکمل آمادگی ظاہر نہیں کر رہا، لیکن دونوں فریقین کے درمیان بات چیت جاری ہے۔
ادھر مقامی کوچز بھی اس دوڑ میں شامل ہیں، جن میں سابق ہیڈ کوچز ثقلین مشتاق، مصباح الحق اور سابق آل راؤنڈر عبدالرزاق شامل ہیں، جنہوں نے قومی ٹیم کے ساتھ دوبارہ کام کرنے میں دلچسپی ظاہر کی ہے۔
دوسری جانب پی سی بی نے اگلے ہفتے سلیکشن کمیٹی کا اجلاس بھی طلب کر لیا ہے، جس میں بنگلہ دیش کے خلاف پانچ ٹی ٹوئنٹی میچز کے لیے کھلاڑیوں کے ناموں پر مشاورت کی جائے گی۔
شائقین کرکٹ اور ماہرین تجزیہ کر رہے ہیں کہ نیا کوچ کون ہوگا، اور آیا قومی ٹیم میں نئے دور کا آغاز مائیک ہیسن کے تجربے سے ہوگا یا کوئی مقامی لیجنڈ دوبارہ ذمہ داریاں سنبھالے گا۔
