آسٹریلیا کے شہر سڈنی کے ساحل پر جاری تقریب میں فائرنگ کے واقعے کے بعد کرکٹ آسٹریلیا نے اپنے معمولات سے ہٹ کر کچھ غیر معمولی اقدامات کیے۔ بگ بیش لیگ (BBL) کی ٹیم سڈنی سکسرز کے کھلاڑیوں کو فائرنگ کے بعد فون دیے گئے تاکہ وہ اپنی فیملیز اور قریبی عزیزوں کی خیریت دریافت کر سکیں۔
جب سڈنی میں فائرنگ کا واقعہ پیش آیا، اس وقت سڈنی سکسرز کے کھلاڑی وارم اپ کر رہے تھے۔ فائرنگ کے بعد کھلاڑیوں کے لیے قوانین میں نرمی کی گئی اور انہیں فون فراہم کیے گئے تاکہ وہ اپنے عزیزوں سے رابطہ کر سکیں۔
اسپورٹس میں اینٹی کرپشن کوڈ کی وجہ سے میچ سے قبل یا دوران میچ کھلاڑیوں کو فون استعمال کرنے کی اجازت نہیں ہوتی، اور اس کی خلاف ورزی کی صورت میں ان کے فون سیٹ لے لیے جاتے ہیں۔ تاہم، سڈنی میں پیش آنے والے فائرنگ کے واقعے کی شدت اور کھلاڑیوں کی ذہنی حالت کو مدنظر رکھتے ہوئے کرکٹ آسٹریلیا نے اس قانون میں نرمی کی اور کھلاڑیوں کو اپنے عزیزوں سے رابطہ کرنے کی اجازت دی۔
سڈنی سکسرز اس وقت پرتھ میں بگ بیش لیگ کے پہلے میچ میں پرتھ اسکارچر کے مد مقابل تھی، اور اس واقعے کے بعد کھلاڑیوں کی ذہنی سکونت اور حفاظت کو ترجیح دی گئی۔
