جرمنی کی حکومت نے افغان پناہ گزینوں کے پروگرام کو فوری طور پر ختم کرنے کا اعلان کیا ہے۔ غیر ملکی میڈیا کے مطابق یہ فیصلہ افغان مہاجرین کے جرائم میں ملوث ہونے اور سکیورٹی کے سنگین خطرات کی وجہ سے کیا گیا۔
جرمن میڈیا کی رپورٹس میں کہا گیا ہے کہ جرمنی نے 640 افغان پناہ گزینوں کو ملک میں داخلے کی اجازت دینے سے انکار کر دیا ہے۔ جرمن وزارت داخلہ کے مطابق، جرمنی آنے کے منتظر افغان مہاجرین کے لیے اب کوئی امکانات نہیں ہیں، اور ان کے داخلے کے دروازے بند ہو چکے ہیں۔
اس فیصلے کی وجہ افغان طالبان کی شدت پسندانہ پالیسیوں کو بتایا جا رہا ہے، جس نے عالمی برادری کو افغانستان کے ساتھ سفارتی تعلقات محدود کرنے پر مجبور کیا۔ جرمن میڈیا نے مزید بتایا کہ 2024 میں جرمنی نے 28 افغان باشندوں کو جرائم کی وجہ سے ملک بدر کیا، جبکہ 2025 میں 81 افغان باشندوں کو ملک سے نکال دیا گیا تھا۔
یہ فیصلہ افغانستان سے باہر نکلنے والے افغان پناہ گزینوں کی تعداد میں کمی لانے اور جرمنی کی سکیورٹی صورتحال کو مستحکم کرنے کے لیے اٹھایا گیا ہے۔
