کرسمس کی تعطیلات سے قبل لندن کے سیاحتی مقامات اور دیگر معروف علاقوں میں اندھیرا چھا جانے کے بعد جرائم اور غیر سماجی رویوں کو روکنے کے لیے سینکڑوں پولیس افسران کو تعینات کر دیا گیا ہے۔ یہ افسران مقامی کاروباروں اور کونسلوں کے ساتھ مل کر شاپنگ کرنے والے افراد کو تحفظ فراہم کر رہے ہیں۔
لندن کے زیادہ رش والے علاقوں میں، یونیفارم میں ملبوس پولیس افسران کے علاوہ سادہ کپڑوں میں بھی افسران موجود ہیں، جو شاپ لفٹنگ کرنے والوں اور خواتین و لڑکیوں کو تشدد کی دھمکیاں دینے والوں پر نظر رکھے ہوئے ہیں۔ اس اقدام کا مقصد عوام کی حفاظت اور جرائم کے انسداد کو یقینی بنانا ہے۔
لندن کے میئر سر صادق خان کی قیادت میں، سٹی ہال نے جرائم سے نمٹنے اور عوام کے اعتماد کی بحالی کے لیے مالی تعاون فراہم کیا ہے۔ چاقو کے جرائم کے حوالے سے میٹ پولیس نے ویسٹ منسٹر، لیمبتھ، سدک اور ہیرنگے جیسے علاقوں کی نشاندہی کی ہے، جہاں یہ جرائم زیادہ ہوتے ہیں۔ پولیس افسران کے پاس لائیو فیشل ریکگنیشن، ٹریفک انٹرسپٹر اور ای بائیک کی ٹیمیں بھی موجود ہیں، تاکہ جرائم کی روک تھام کی جا سکے۔
سٹی ہال کے مطابق، سال کے اس وقت کو "گولڈن کوارٹر” کہا جاتا ہے، جب لندن میں ایک بلین پاؤنڈ سے زیادہ کا کاروبار ہوتا ہے۔ میئر سر صادق خان کا کہنا ہے کہ لندن کا کوئی موازنہ نہیں اور اس کی ہائی اسٹریٹس، ریٹیلرز اور ریسٹورنٹس لوگوں کو خوش آمدید کہنے کے لیے تیار ہیں۔ اس موسم میں، لندن میں سیاحت اور خریداری کا موسم عروج پر ہوتا ہے، اور اس بات کو یقینی بنانے کے لیے کہ لوگ محفوظ محسوس کریں، پولیس کی مزید موجودگی ضروری تھی۔
