پرو ہاکی لیگ، پاکستان کو لگاتار چوتھی شکست، ارجنٹائن نے 5-1 سے ہرادیا
ارجنٹائن کے شہر سنتیاگو میں جاری پرو ہاکی لیگ کے چوتھے میچ میں پاکستان ہاکی ٹیم کو ایک اور شکست کا سامنا کرنا پڑا۔ ارجنٹائن نے پاکستان کو ایک کے مقابلے میں پانچ گول سے شکست دے کر گرین شرٹس کی مسلسل چوتھی ہار رقم کر دی ہے۔
پاکستانی ٹیم اس ٹورنامنٹ میں اب تک کوئی فتح حاصل نہیں کر سکی ہے۔ پہلے میچ میں نیدرلینڈز نے پاکستان کو دو کے مقابلے میں پانچ گول سے شکست دی، دوسرے میچ میں ارجنٹائن نے پاکستان کو تین ایک سے ہرایا، جبکہ تیسرے میچ میں نیدرلینڈز نے پاکستانی ٹیم کو سات تین سے مات دی۔
چوتھے میچ میں بھی پاکستانی ٹیم دفاع اور حکمتِ عملی کے حوالے سے کمزور دکھائی دی۔ ارجنٹائن نے کھیل پر مکمل گرفت برقرار رکھی اور پانچ ایک سے واضح برتری حاصل کی۔ اس مسلسل ناکامی کے بعد پاکستانی ٹیم کی مینجمنٹ اور حکمتِ عملی پر سوالات اٹھنے لگے ہیں۔
یہ صورتحال پاکستانی ہاکی کے شائقین کے لیے تشویش کا باعث بنی ہوئی ہے، اور بہت سے لوگ ٹیم کی کارکردگی میں بہتری کی توقع کر رہے ہیں تاکہ مستقبل میں اس طرح کی شکستوں کا سلسلہ ختم ہو سکے۔
