اسلام آباد میں جاری دوسری عالمی باکسنگ چیمپئن شپ کے تیسرے روز وزیر داخلہ اور چیئرمین پی سی بی محسن نقوی نے جناح اسپورٹس کمپلیکس کا دورہ کیا اور فائٹ فار گلوری کے دلچسپ مقابلے دیکھے۔ اس موقع پر پاکستانی نژاد برطانوی باکسر عامر خان بھی باکسنگ ایرینا میں موجود تھے۔
محسن نقوی نے باکسنگ مقابلوں میں گہری دلچسپی کا اظہار کرتے ہوئے پاکستان میں انٹرنیشنل باکسنگ ایونٹ منعقد ہونے کو سراہا۔ انہوں نے مختلف کیٹیگریز میں کامیاب ہونے والے باکسرز میں میڈل بھی تقسیم کیے۔
اہم باوٹ اور نتائج
ایشیا گولڈ مڈل ویٹ ٹائٹل
برطانوی باکسر جیمز میٹکالف نے ڈومینیکن ریپبلک کے جیولو ڈی جیسس کو تیسرے راؤنڈ میں ناک آؤٹ کرکے ٹائٹل اپنے نام کیا۔
WBA ایشیا ساؤتھ ویلٹر ویٹ ٹائٹل
ارجنٹائن کے البرٹو پلمیٹا نے فلپائنی باکسر جوفر منٹانو کو شکست دے کر ٹائٹل جیت لیا۔
سپر بنٹم ویٹ باوٹ
امریکی باکسر لارنس نیوٹن نے جون السنترا (ڈومینیکن ریپبلک) کے خلاف چھ راؤنڈ مکمل ہونے کے بعد فیصلے کی بنیاد پر کامیابی حاصل کی اور ٹائٹل اپنے نام کیا۔
بین الاقوامی سطح کے ان مقابلوں میں دنیا بھر کے باکسرز کی شرکت اور اعلیٰ کارکردگی نے ایونٹ کو انتہائی دلچسپ بنا دیا ہے۔ پاکستان میں عالمی باکسنگ کا انعقاد اسپورٹس کے فروغ کے لیے مثبت پیش رفت قرار دیا جا رہا ہے۔
