اسلام آباد (اسپورٹس ڈیسک) — سری لنکا کرکٹ ٹیم اپنے کپتان چریتھ اسالنکا کی قیادت میں پاکستان پہنچ گئی۔ نیو اسلام آباد انٹرنیشنل ایئرپورٹ پر ٹیم کا پرتپاک خیرمقدم پاکستان کرکٹ بورڈ (پی سی بی) کے آفیشلز نے کیا۔
سری لنکا کی ٹیم پاکستان میں تین ون ڈے انٹرنیشنل میچوں کی سیریز کھیلنے کے لیے آئی ہے، جو 11 سے 15 نومبر تک راولپنڈی کرکٹ اسٹیڈیم میں کھیلی جائے گی۔
ان تین ون ڈے میچز کے بعد، پاکستان کرکٹ بورڈ نے ایک اور دلچسپ ٹورنامنٹ کا اعلان کیا ہے۔
17 نومبر سے شروع ہونے والی ٹی ٹوئنٹی ٹرائنگولر سیریز میں پاکستان، زمبابوے اور سری لنکا کی ٹیمیں ایک دوسرے کے مدمقابل ہوں گی۔ یہ ٹورنامنٹ راولپنڈی اور لاہور کے کرکٹ میدانوں میں 29 نومبر تک جاری رہے گا۔
پی سی بی کے مطابق، یہ میچز نہ صرف پاکستانی شائقینِ کرکٹ کے لیے تفریح اور جوش و خروش کا موقع ہوں گے بلکہ ان سیریز کے ذریعے پاکستان اور سری لنکا کے کرکٹ تعلقات مزید مضبوط ہوں گے۔
