جاپان میں 75 سالہ خاتون گرفتار، بیٹی کی لاش 20 سال تک فریزر میں رکھنے کا اعتراف
ٹوکیو (25 ستمبر 2025) – جاپان میں پولیس نے ایک 75 سالہ خاتون کو گرفتار کر لیا ہے، جس نے اعتراف کیا ہے کہ اس نے اپنی بیٹی کی لاش کو گزشتہ 20 سالوں سے فریزر میں محفوظ رکھا ہوا تھا۔
پولیس حکام کے مطابق، کییکو موری نامی خاتون نے منگل کے روز خود پولیس کے سامنے پیش ہو کر بتایا کہ اس کے گھر میں ایک لاش موجود ہے۔ بعد ازاں پولیس نے ایباراکی صوبے میں واقع اس کے گھر کی تلاشی لی، جہاں ایک ڈیپ فریزر سے ایک بالغ خاتون کی لاش برآمد ہوئی۔
پولیس ترجمان کا کہنا ہے کہ موری نے لاش کی شناخت اپنی بیٹی مکی کو کے طور پر کی، جو 1975 میں پیدا ہوئی تھی اور اگر زندہ ہوتی تو 50 سال کی ہوتی۔ لاش کی حالت بگڑ چکی تھی اور سڑن کے آثار واضح تھے۔ حکام نے لاش کو قبضے میں لے کر پوسٹ مارٹم کے لیے بھجوا دیا ہے تاکہ موت کی اصل وجوہات معلوم کی جا سکیں۔
پولیس کے مطابق، لاش فریزر میں منہ کے بل اور گھٹنوں کے بل پڑی ہوئی تھی۔ موری کا کہنا ہے کہ وہ لاش کو فریزر میں اس لیے رکھتی رہی کیونکہ گھر میں بدبو پھیل رہی تھی۔
پولیس نے موری کو لاش کو چھپانے اور فریزر میں محفوظ رکھنے کے جرم میں گرفتار کر لیا ہے، تاہم اس بات کی مزید تفتیش کی جا رہی ہے کہ موت کن حالات میں ہوئی اور کیا اس میں کسی قسم کا جرم یا غفلت شامل تھی۔
موری کے دیگر بچوں کے حوالے سے پولیس نے تاحال کوئی بیان جاری نہیں کیا، اور یہ واضح نہیں کہ انہیں اس واقعے کا علم تھا یا نہیں۔
یہ واقعہ جاپان میں نہ صرف ایک قانونی بلکہ سماجی سطح پر بھی سنجیدہ سوالات اٹھا رہا ہے، خاص طور پر عمر رسیدہ افراد کی ذہنی صحت، تنہائی، اور خاندانی نظام کی موجودہ صورتحال کے حوالے سے۔
