مقبوضہ کشمیر میں کلاؤڈ برسٹ کی ہولناک تباہی: 46 جاں بحق، 200 سے زائد لاپتا

سرینگر (نیوز ڈیسک): مقبوضہ کشمیر کے ضلع کشتوار میں شدید کلاؤڈ برسٹ (بادل پھٹنے) کے نتیجے میں خوفناک تباہی مچ گئی، جس میں کم از کم 46 افراد جاں بحق ہو چکے ہیں، جب کہ 200 سے زائد افراد تاحال لاپتا ہیں۔

حادثہ اس وقت پیش آیا جب متاثرہ گاؤں میں ہندو یاتریوں سمیت ہزار سے زائد افراد موجود تھے۔ سیلابی ریلے نے درجنوں گھروں، خیموں اور دکانوں کو اپنی لپیٹ میں لے کر مکمل طور پر تباہ کر دیا، جس کے باعث پورا گاؤں ملیا میٹ ہو گیا۔

عینی شاہدین کی دل دہلا دینے والی روداد

مقامی افراد کے مطابق، یہ واقعہ انتہائی خوفناک تھا۔ "ہم نے اپنی آنکھوں سے پورے پورے خاندانوں کو پانی میں بہتے دیکھا، کوئی بھی محفوظ نہ رہا،” ایک مقامی رہائشی نے روتے ہوئے میڈیا کو بتایا۔

ریسکیو آپریشن جاری

ریسکیو ادارے، مقامی پولیس، فوج اور رضاکار مشترکہ طور پر امدادی کارروائیوں میں مصروف ہیں۔ اب تک 46 لاشیں نکالی جا چکی ہیں، جب کہ 200 سے زائد افراد کی تلاش جاری ہے۔ زخمیوں کی تعداد 100 سے تجاوز کر گئی ہے، جن میں 30 سے زائد کی حالت تشویشناک بتائی جا رہی ہے۔ انہیں قریبی اسپتالوں میں منتقل کیا جا رہا ہے۔

مزید خطرات، بارشیں اور لینڈ سلائیڈنگ کا خدشہ

محکمہ موسمیات نے آئندہ 48 گھنٹوں کے دوران مزید شدید بارشوں اور لینڈ سلائیڈنگ کی پیشگوئی کی ہے، جس کے باعث متاثرہ علاقوں میں ہائی الرٹ جاری کر دیا گیا ہے۔

فوری امداد کی اپیل

متاثرہ علاقے کے مکینوں نے حکومت، امدادی اداروں اور فلاحی تنظیموں سے فوری امداد فراہم کرنے کی اپیل کی ہے۔ خوراک، پانی، ادویات اور شیلٹر کی شدید قلت کا سامنا ہے۔