ایشین باکسنگ بورڈ میں پاکستان کی شاندار کامیابی، بھارت کو 18-9 ووٹوں سے شکست

اسلام آباد: پاکستان نے کھیلوں کے عالمی منظرنامے پر ایک اور نمایاں کامیابی حاصل کرتے ہوئے بھارت کو ایشین باکسنگ کے بورڈ آف ڈائریکٹرز کے انتخاب میں فیصلہ کن شکست دے دی۔ تھائی لینڈ میں منعقدہ ایشین باکسنگ کانگریس اجلاس میں پاکستان کے خالد محمود 18 کے مقابلے میں 9 ووٹوں سے کامیاب قرار پائے۔

خالد محمود، جو پاکستان اولمپک ایسوسی ایشن کے سیکریٹری جنرل بھی ہیں، ایشیائی سطح پر پاکستان کی نمائندگی کرنے کے لیے اس اعلیٰ منصب پر فائز ہوئے ہیں۔ اس کامیابی نے نہ صرف اسپورٹس ڈپلومیسی میں پاکستان کی حیثیت کو مزید مستحکم کیا بلکہ بین الاقوامی سطح پر پاکستان کے مثبت امیج کو بھی فروغ دیا۔

صدر پاکستان باکسنگ فیڈریشن لیفٹیننٹ کرنل (ر) ناصر ٹنگ نے اس موقع کو ملک کے لیے باعث فخر قرار دیا۔ ان کا کہنا تھا، ’’یہ کامیابی عالمی سطح پر پاکستان کی باکسنگ اور اسپورٹس لیڈرشپ پر بڑھتے ہوئے اعتماد کا مظہر ہے۔‘‘

انہوں نے مزید کہا کہ خالد محمود کا انتخاب نہ صرف پاکستان کے لیے اعزاز ہے بلکہ یہ خطے میں کھیلوں کے ذریعے سفارتی تعلقات کو فروغ دینے میں بھی اہم سنگ میل ثابت ہوگا۔

یہ پیش رفت اس امر کی بھی عکاسی کرتی ہے کہ پاکستان کھیلوں میں صرف میدان میں نہیں، بلکہ سفارتی سطح پر بھی اپنی جگہ بنا رہا ہے — ایک ایسا پہلو جو مستقبل میں کھیلوں کے فروغ کے لیے کلیدی کردار ادا کرے گا۔